Në një kohë kur protestat e opozitës janë rikthyer në bulevard dhe përplasjet me policinë kanë shënuar muajt e fundit të jetës politike në Tiranë, Drejtoria e Përgjithshme e Policisë së Shtetit ka hapur me urgjencë një tender për blerjen e gazit lotsjellës që do të përdoret nga makinat speciale të ujit për menaxhimin e turmave.
Sipas dokumenteve që ka konsultuar skyweb.al, bëhet fjalë për lëndën “OC Gas Solution”, me bazë Oleoresin Capsicum, një substancë irrituese që përdoret nga policitë për shpërndarjen e turmave, neutralizimin e përkohshëm të personave të dhunshëm dhe kontrollin e trazirave.
Policia e Shtetit e cilëson këtë blerje si pjesë të rritjes së kapaciteteve operacionale të Forcës Kombëtare të Sigurisë.
Fondi limit i procedurës është 50.9 milionë lekë pa TVSH, ose rreth 61 milionë lekë të reja me TVSH.
Tenderi është hapur përmes një “procedure të kufizuar”, në kuadër të ligjit për prokurimet në fushën e mbrojtjes dhe sigurisë.
Pjesa më e fortë e dokumentit është arsyeja pse Policia kërkon shkurtimin e afateve. Autoriteti kontraktor thotë se ndodhet në “kushtet e emergjencës”, pasi makinat speciale që përdoren për menaxhimin e turmave nuk janë të furnizuara me gaz lotsjellës.
Policia ka aktualisht në përdorim 8 automjete speciale për menaxhimin e trazirave, por të gjitha këto automjete nuk janë të mbushura me lëndën OC Gas Solution. Sipas vetë Policisë, kjo gjendje ndikon negativisht në operacionalitetin e strukturave dhe në aftësinë për të menaxhuar trazira apo për të neutralizuar persona të dhunshëm.
Edhe më domethënës është fakti se kompletimi i fundit i këtyre automjeteve me gaz lotsjellës është bërë në vitin 2011.
Pra, prej rreth 15 vitesh, makinat speciale të ujit nuk kanë qenë të pajisura me këtë lëndë, edhe pse janë pjesë e strukturave që përdoren në situata protestash, trazirash apo ndërhyrjesh për rendin publik.
Gazi që kërkon të blejë Policia nuk është një spray dore që përdoret nga efektivët individualisht.
Lënda përdoret për mbushjen e automjeteve speciale të menaxhimit të turmave dhe lëshohet në formë “shiu”, e përzier me ujin në raport 5 deri në 10 për qind.
Kjo do të thotë se makinat e ujit, përveç presionit të ujit, mund të hedhin edhe lëndë irrituese mbi turmat. OC, ose Oleoresin Capsicum, është përbërësi aktiv i njohur ndryshe si lëndë me bazë speci djegës.
Agjencitë shëndetësore e klasifikojnë si agjent për kontrollin e turmave, që shkakton irritim të syve, gojës, fytit, mushkërive dhe lëkurës, duke e bërë përkohësisht personin të paaftë të funksionojë normalisht.
Ekspozimi ndaj kësaj lënde mund të shkaktojë djegie të fortë në sy, lotim, mbyllje të pavullnetshme të qepallave, kollë, vështirësi në frymëmarrje, acarim të lëkurës dhe irritim të rrugëve të frymëmarrjes.
Në raste ekspozimi të gjatë, në sasi të madhe apo në ambiente të mbyllura, efektet mund të jenë më serioze.
Policia e justifikon blerjen edhe me faktin se është në proces të marrjes së dy automjeteve të reja për menaxhimin e trazirave dhe sigurinë e rendit publik.
Sipas dokumentit, kontrata për këto mjete pritet të lëvrohet brenda dy deri në katër muaj, por operatori ekonomik nuk merr përsipër furnizimin fillestar me gaz lotsjellës dhe lëndë të tjera shoqëruese.
Për këtë arsye, Policia thotë se pa këtë lëndë nuk mund të bëhet testimi në prodhim i automjeteve, testimi gjatë pranimit, trajnimi i operatorëve dhe punonjësve të policisë, si dhe vënia në gatishmëri e automjeteve speciale.
Tenderi vjen në një moment politik të ndjeshëm. Gjatë muajve të fundit, opozita ka organizuar disa protesta antiqeveritare në Tiranë, ndërsa në disa prej tyre janë raportuar përplasje me policinë, përdorim uji dhe gazi lotsjellës ndaj protestuesve. /skyweb.al
