Kryeministri Edi Rama ka reaguar ndaj raportimeve të mediave ndërkombëtare për protestat kundër projektit të planifikuar në Zvërnec, duke i cilësuar ato si pjesë të një deformimi të madh mes realitetit në terren dhe mënyrës se si ngjarja është paraqitur në hapësirën mediatike globale.
Në një postim të gjatë në rrjetin social X, drejtuar edhe CNN dhe mediave të tjera të huaja, Rama deklaroi se protesta e zhvilluar këtë të shtunë ka mbledhur rreth 2 mijë pjesëmarrës, ndërsa sipas tij, edhe në kulmin e saj pjesëmarrja nuk ka kaluar 8 mijë persona.
Reagimi vjen në një moment kur protestat kundër projektit në Zvërnec kanë hyrë në ditët e tyre më të forta dhe ku thirrjet e qytetarëve nuk janë kufizuar vetëm te kundërshtimi i një projekti turistik. Në shesh, protestuesit kanë artikuluar edhe një zemërim më të gjerë ndaj klasës politike, me thirrjet “Rama në burg” dhe “Berisha në burg”, duke kërkuar simbolikisht varrosjen e një sistemi politik që, sipas tyre, ka prodhuar të njëjtat pasoja për vendin.
Në këtë klimë, Rama ka zgjedhur t’u drejtohet mediave të huaja, duke kundërshtuar përmasat që protesta ka marrë në raportimet ndërkombëtare dhe duke ngritur pikëpyetje mbi mënyrën se si një çështje lokale është kthyer në lajm global.
“Atëherë si shpjegohet që ajo që një pjesë e madhe e botës ka parë gjatë ditëve të fundit duket kaq e madhe, kaq dramatike dhe kaq mbresëlënëse?”, shkruan Rama.
Sipas kryeministrit, hendeku mes realitetit në terren dhe perceptimit publik është kthyer në një simptomë të një problemi më të madh të ekosistemit të informacionit. Ai pyet se si një protestë me disa mijëra pjesëmarrës mund të shndërrohet në një spektakël ndërkombëtar dhe se si supozimet, sipas tij, janë kthyer në fakte pa u verifikuar më parë.
Rama këmbëngul se për projektin e Zvërnecit nuk ka ende një projekt përfundimtar, nuk ka leje ndërtimi dhe nuk ka nisur asnjë punim. Sipas tij, ekziston vetëm një vizion dhe një plan për ta kthyer Shqipërinë në një destinacion turistik elitar, duke synuar një zhvillim që të ketë ndikim pozitiv në mjedis.
“Realiteti është ky: Nuk ka ende një projekt. Nuk ka ende një leje ndërtimi. Nuk ka ende ndërtim. Madje nuk ka ende as një projekt përfundimtar”, shkruan ai.
Kreu i qeverisë thotë se ambicia nuk është thjesht të ndërtohet, por të provohet se zhvillimi dhe përmirësimi i mjedisit mund të ecin së bashku. Ai pretendon se koncepti aktual synon rreth 25 për qind më shumë pemë dhe hapësira të gjelbra sesa ekzistojnë sot, si edhe përmirësime të matshme në tregues të biodiversitetit.
Sipas Ramës, për këtë projekt po punojnë ekspertë ndërkombëtarë në fushat e ekologjisë, biodiversitetit, arkitekturës së peizazhit, inxhinierisë mjedisore dhe turizmit të qëndrueshëm. Ai thekson se suksesi ose dështimi i tyre duhet të vlerësohet në të ardhmen përmes shkencës, debatit publik dhe transparencës.
Por kryeministri e ka përqendruar reagimin e tij edhe te ajo që e quan “histeri digjitale”. Ai pretendon se rreth çështjes së Zvërnecit janë shpërndarë imazhe të manipuluara, deepfake, pretendime të fabrikuara dhe përmbajtje të amplifikuara në mënyrë të koordinuar.
“Gjatë rrugës u shfaqën deepfake, imazhe të manipuluara, pretendime të fabrikuara, amplifikim i koordinuar, rrjete anonime dhe sjellje online që mbartin shumë nga karakteristikat e luftës hibride të informacionit”, shkruan Rama.
Sipas tij, platformat sociale kanë regjistruar një rritje të menjëhershme të aktivitetit rreth kësaj teme, veçanërisht në gjuhën shqipe. Rama thotë se një pjesë e këtij aktiviteti duket se ka ardhur nga profile të krijuara rishtazi, llogari anonime dhe faqe pa histori të qartë, duke ngritur dyshime për amplifikim artificial të debatit.
Megjithatë, përtej akuzave të kryeministrit për manipulim digjital, protesta në Tiranë ka marrë një karakter më të gjerë politik dhe qytetar. Kundërshtimi ndaj projektit në Zvërnec është kthyer në pikë grumbullimi për një pakënaqësi më të madhe ndaj mënyrës së qeverisjes, përdorimit të territorit dhe raportit mes interesit publik dhe investimeve të mëdha private.
Thirrjet kundër Ramës dhe Berishës tregojnë se një pjesë e protestuesve nuk e shohin më çështjen vetëm si betejë për një zonë të mbrojtur, por si revoltë ndaj një klase politike që prej dekadash shihet si përgjegjëse për degradimin e institucioneve, korrupsionin dhe mungesën e llogaridhënies.
Në këtë kuptim, letra e Ramës për mediat e huaja nuk është vetëm një reagim ndaj raportimeve ndërkombëtare. Ajo është edhe një përpjekje për të rimarrë kontrollin e narrativës në një moment kur protesta po del përtej kufijve të një debati mjedisor dhe po kthehet në shprehje të një zemërimi më të thellë publik.
