Linja ajrore me kosto të ulët, Ryanair, ka njoftuar se do të rrisë përmasat e çantës personale që lejohet të merret falas në kabinë me 20%, duke reflektuar standardin e ri të miratuar nga Bashkimi Europian për bagazhet e dorës.
Pasagjerët do të lejohen të marrin një çantë, si p.sh. një çantë dore ose çantë laptopi, me përmasa deri në 40 cm x 30 cm x 20 cm, që do të vendoset nën sediljen përpara dhe të mos peshojë më shumë se 10 kg.
Kjo përfaqëson një rritje prej 20% në vëllim në krahasim me përmasat aktuale të lejuara nga Ryanair (40 x 25 x 20 cm).
Vendimi vjen në një kohë kur BE ka vendosur të unifikojë standardin minimal të çantës falas për të shmangur konfuzionin mes udhëtarëve që përdorin linja të ndryshme.
Sipas standardit të ri europian, përmasat minimale duhet të jenë 40 x 30 x 15 cm, pra Ryanair do të ofrojë një çantë falas me vëllim më të madh se ky minimum.
Zbatimi i masës së re do të nisë “në javët në vijim”, sipas Ryanair, pasi pajisjet e matjes së çantave të përditësohen me standardin e ri. Megjithatë, linja ajrore nuk ka dhënë një arsye zyrtare se pse ka zgjedhur të jetë më bujare me përmasat, ndonëse kjo shihet si një përgjigje ndaj konkurrencës dhe presionit të rregullatorëve europianë.
Në krahasim me konkurrentët:
- EasyJet lejon një çantë falas me përmasa 45 x 36 x 20 cm, më e madhe se Ryanair.
- Wizz Air ka të njëjtat përmasa të reja si Ryanair: 40 x 30 x 20 cm me peshë deri në 10 kg.
- British Airways lejon një çantë më të vogël nën sedilje (40 x 30 x 15 cm), por gjithashtu ofron një bagazh të dytë në kabinë pa pagesë, deri në 23 kg.
Për vite me radhë, udhëtarët janë përballur me tarifime të papritura për bagazhet, për shkak të ndryshimeve të vogla në rregullat e çdo kompanie. Kjo ka shtyrë BE-në të vendosë standarde minimale për të garantuar qartësi dhe transparencë për pasagjerët, veçanërisht ata që fluturojnë shpesh me kompani të ndryshme.
Ndërkohë, Komiteti i Transportit i Parlamentit Europian ka votuar muajin e kaluar pro një propozimi që u jep pasagjerëve të drejtën për një bagazh të dytë falas deri në 7 kg.
Ky propozim ende duhet të miratohet nga Parlamenti i plotë./skyweb.al
