Plazhe mahnitëse, natyrë e paprekur, vende historike të pazakonta dhe çmime të ulëta e kanë kthyer Shqipërinë në një nga destinacionet më të reja të Evropës, shkruan gazetarja Valeriya Safronova për prestigjiozen amerikane New York Times.
Në jug të vendit, pranë ishullit grek të Korfuzit, qëndron qyteti antik i Butrintit, një trashëgimi mijëravjeçare me teatër në natyrë, pagëzimore bizantine, ujësjellës romak dhe një park kombëtar prej 93 kilometrash katrorë ku enden dhelpra, skifterë dhe shqiponja. Vetëm dhjetë minuta larg, resorti modern i Ksamilit ofron një atmosferë të gjallë mes shezlongëve, muzikës elektronike dhe sporteve ujore, shpesh i krahasuar nga influencerët me Maldivet.
Shqipëria është një destinacion ku mund të shëtitësh nëpër rrënoja antike në mëngjes dhe të kërcesh mbi rërë në mbrëmje. Kjo, sipas autorës, është një nga arsyet pse vendi po tërheq çdo vit më shumë vizitorë: 11,7 milionë turistë në vitin e kaluar nga 10 milionë një vit më parë. Përveç bregdetit, ata eksploruan malet, liqenet e veriut dhe Parkun Kombëtar të Lumit të Egër Vjosë, i përfshirë nga New York Times në listën e 52 vendeve për t’u vizituar në vitin 2023.
“Shqipëria është ende një vend ekzotik për shumë njerëz”, tha Frenkli Prengaj nga “Discover Albania”.
Vendi, i shtrirë mes Greqisë dhe Malit të Zi, shpalli pavarësinë në vitin 1912. Nga vitet ’40 deri në vitin 1990, Shqipëria jetoi nën një diktaturë staliniste, e izoluar nga bota. Në fund të viteve ’90 përjetoi krizë ekonomike dhe trazira, por sot, me stabilizimin politik dhe çmimet e ulëta, turizmi është bërë motor i zhvillimit.
Ksamil është shembulli i qartë i kësaj Shqipërie të re. Dikur zonë bujqësore e kufizuar për shkak të afërsisë me Korfuzin, sot është kthyer në një resort të gjallë. Gazetarja përshkruan një drekë të qetë me oktapod (1 800 lekë) në “Freskia e Jonit”, me pamje nga uji kristal dhe ishujt e gjelbër. Për pushime më të qeta, turistët mund të zgjedhin Jalën, Borshin apo Dhërmiun, ku zhvillohet edhe festivali i muzikës “Kala”.
Vetëm 20 minuta larg Ksamilit, Saranda ofron plazhe publike, shëtitore të gjallë dhe restorante me ushqim deti si “Haxhi” dhe “Marini”. Autorja tregon se qëndroi në “LaFe Boutique Hotel” dhe shijoi atmosferën familjare të qytetit.
Berati, një tjetër destinacion i veçantë, i listuar nga UNESCO, shquhet për çatitë e kuqe dhe dritaret e shumta të shtëpive. Kalaja, kishat bizantine, xhamitë e hershme dhe muzeu “Onufri” dëshmojnë historinë e pasur. Në “Amalia Homemade Food”, gazetarja shijoi një menu tradicionale me sallata të freskëta, perime të pjekura, byrek dhe biftek, të shoqëruar me raki të bërë me kanellë.
Në Gjirokastër, të përshkruar nga Ismail Kadare si një “krijesë parahistorike”, vizitorët mund të zbulojnë shtëpitë prej guri, kështjellën dhe tunelet e Luftës së Ftohtë të ndërtuara nga diktatori Enver Hoxha. Agjencia “Experience Gjirokastra” organizon ture në bunkerë për vetëm 200 lekë.
Një nga vizitat më mbresëlënëse ishte ajo në shtëpinë e Skendulajve, ndërtuar mbi 300 vjet më parë, me 64 dritare, 44 dyer, gjashtë banjo dhe katër hamame. “Dhoma e sigurt”, shpjegon Edlira Skenduli, ka shërbyer si strehë për 70 persona gjatë luftërave botërore.
Ndërsa dielli perëndonte mbi qytetin e gurit, gazetarja përshkruan kontrastin mes thirrjes melodike për lutje në luginë dhe atmosferës së largët të plazheve të zhurmshme përtej maleve.
