Turizmi në Shqipëri vijon të shënojë ritme të larta rritjeje, me të dhënat më të fundit nga INSTAT që konfirmojnë një muaj shkurt shumë më të ngarkuar për strukturat akomoduese krahasuar me të njëjtën periudhë të vitit të kaluar.
Sipas raportit zyrtar, numri i përgjithshëm i vizitorëve që kanë qëndruar në struktura akomoduese gjatë Shkurtit 2025 është rritur me 29,9% në krahasim me shkurtin 2024. Kjo rritje është mbështetur kryesisht nga rritja e vizitorëve jo-rezidentë me 32,2%, ndërsa edhe rezidentët shqiptarë kanë kontribuar ndjeshëm, me një rritje prej 26,4%.
Në të njëjtën linjë pozitive janë shënuar edhe net qëndrimet, të cilat janë rritur me 34,2% në total. Këtu, net qëndrimet e vizitorëve të huaj janë rritur me 35,4%, ndërsa ato të rezidentëve shqiptarë me 32%, çka tregon jo vetëm një rritje të numrit të turistëve, por edhe një zgjatje të qëndrimit të tyre mesatar në vend.
Jo vetëm deti..
Një tjetër zhvillim domethënës është rritja më e madhe e vizitorëve të huaj në zonat jo-bregdetare, ku është shënuar një rritje prej 29%. Kjo prirje sugjeron një diversifikim të ofertës turistike dhe një interes në rritje për turizmin kulturor, natyror apo malor gjatë muajve të dimrit. Po ashtu, hotelet dhe strukturat tradicionale të akomodimit mbeten zgjedhja kryesore për turistët, me një rritje prej 29,1% në këtë kategori.
Më shumë italianë
Sipas vendit të rezidencës, pjesa më e madhe e turistëve të huaj në Shkurt kanë ardhur nga Italia (22%), e ndjekur nga Kosova (16%) dhe Gjermania (7%). Mbretëria e Bashkuar dhe Franca kanë kontribuar me 6% dhe 4%, ndërsa pjesa tjetër prej 45% vjen nga vende të tjera, duke treguar një përhapje gjeografike gjithnjë e më të gjerë të turistëve që zgjedhin Shqipërinë në dimër.
Norma e shfrytëzimit të dhomave , një tregues për t’u shqyrtuar
Pavarësisht rritjes së vizitorëve dhe net qëndrimeve, norma e shfrytëzimit të dhomave në hotele ka mbetur thuajse e pandryshuar, me një nivel prej 16,5% në Shkurt 2025, krahasuar me 16,7% në të njëjtin muaj të vitit të kaluar. Kjo sugjeron që kapacitetet e lira në dispozicion mbeten të larta dhe se industria ende ka hapësirë për të rritur efikasitetin në menaxhimin e burimeve. /skyweb.al
