Më shumë se gjysma e shqiptarëve, rreth 55%, deklarojnë se e kanë të vështirë ose shumë të vështirë të përballojnë shpenzimet mujore, sipas një raporti të Eurostat mbi varfërinë subjektive në Europë.
Megjithatë, Shqipëria nuk është vendi me perceptimin më të lartë të varfërisë: Greqia mban rekordin, pasi 67% e grekëve ndihen të varfër, ndonëse shumë prej tyre nuk përfshihen në statistikat zyrtare të varfërisë.
Treguesi i varfërisë subjektive mat perceptimin personal të qytetarëve për aftësinë e tyre ekonomike, ndryshe nga matjet zyrtare që bazohen vetëm në të ardhura. Sipas Eurostat, në Bashkimin Europian vetëm 17.4% e qytetarëve e kanë të vështirë të mbyllin muajin, shumë më pak se mesatarja shqiptare.
Në Shqipëri, kontrasti mes perceptimit dhe realitetit financiar është i lartë: ndërsa rreth 20% e popullsisë llogaritet në rrezik varfërie sipas të ardhurave, mbi gjysma ndihen të tillë. Kjo tregon një pasiguri të lartë ekonomike që ndikohet nga çmimet, borxhet dhe standardi i jetesës, sipas Monitor.
Në nivel rajonal, pas Shqipërisë, perceptim më të lartë të varfërisë kanë Maqedonia e Veriut dhe Mali i Zi, ku pothuajse gjysma e popullsisë e konsideron veten të varfër.
Në BE, përveç Greqisë, vendet me më shumë qytetarë që ndihen në vështirësi financiare janë Bullgaria (37%) dhe Sllovakia (28%), ndërsa më të qetët ekonomikisht janë Holanda dhe Gjermania, me vetëm 7% të popullsisë që ndihen të varfër.
