Biznesmeni Behgjet Pacolli ka folur në emisionin “Opinion” për përplasjen me Valon Ademin lidhur me aksionet e Aeroportit të Vlorës, pas skandalit dhe akuzave për një marrëveshje të noterizuar për transferimin e 47 për qind të aksioneve.
Sipas Ademit, ekziston një dokument i nënshkruar që vërteton marrëveshjen, por Pacolli e ka mohuar kategorikisht këtë, duke sqaruar se ka firmosur disa letra pa e ditur përmbajtjen e tyre.
Ai tha se në korrik të vitit 2023 ka nënshkruar një dokument që ia kishte dërguar Valon Lluka, ish-administratori i aeroportit, pa e lexuar fare.
“Ishe me pushime, më merr Valon Lluka nga Prishtina dhe më kërkon firmën për disa veprime në bankë. Erdhi shoferi me një dosje, thava duart dhe firmosa, por nuk e pash çfarë firmosa,” deklaroi çuditërisht Pacolli.
Ai shtoi se dy vite më vonë ka zbuluar se bëhej fjalë për një kontratë që parashikonte transferimin e aksioneve në prill 2025.
Pacolli pranoi gjithashtu se nuk e di saktësisht sa para janë harxhuar në ndërtimin e aeroportit dhe se me Valon Ademin kishin një marrëveshje gojore (!) për të ndarë aksionet në bazë të shpenzimeve të secilit pas përfundimit të projektit.
Nga ana tjetër, Valon Ademi e ka akuzuar Pacollin për moszbatim të marrëveshjes dhe për përpjekje për ta përjashtuar nga projekti i Aeroportit të Vlorës.
Duket çuditshëm që një biznesmen miliarder të mos shohë se ku e vë firmën e tij, ndërkohë që skandali në Aeroportin e Vlorës ka marrë përmasa ndërkombëtare pas dyshimeve se në lojë janë dhe rusët që po rikthehen pas 7 dekadash në Vlorë me ndihmën e Pacollit! /skyweb.al
