Sipas raportit të fundit të Organizatës Botërore të Shëndetësisë, në Shqipëri më shumë se 30 për qind e fëmijëve 8-vjeçarë janë mbipeshë. Nga këta, rreth 15 për qind janë të prekur nga obeziteti, me një përqindje më të lartë tek djemtë sesa tek vajzat.
Në krahasim me vendet fqinje, shifrat në Shqipëri janë të ngjashme me ato të Maqedonisë së Veriut, Malit të Zi dhe Serbisë, ndërsa Italia dhe Greqia paraqesin përqindje më të larta.
Raporti vëren gjithashtu se në Shqipëri nuk ka dallime të dukshme mes fëmijëve në bazë të nivelit arsimor të prindërve, ndryshe nga disa vende të tjera evropiane ku ndryshimet arrijnë deri në 16 pikë përqindjeje.
Të dhënat tregojnë se mbipesha dhe obeziteti tek fëmijët po kthehen në një problem serioz të shëndetit publik dhe kërkojnë ndërhyrje të menjëhershme në nivel kombëtar dhe lokal. /Skyweb.al
