Franca është gati të nisë ndërtimin e një aeroplanmbajtëseje të re me energji bërthamore, njoftoi presidenti Emmanuel Macron.
“Në kohë agresioni duhet të tregojmë forcë, që të na respektojnë dhe të na kenë frikë. Kam vendosur ta pajis Francën me një aeroplanmbajtëse të re”, deklaroi Macron, duke u cituar nga mediat franceze gjatë një aktiviteti të Krishtlindjeve në një bazë ushtarake franceze në Emiratet e Bashkuara Arabe.
Aeroplanmbajtësja e re do të ketë një zhvendosje prej rreth 80 mijë tonësh, pothuajse dy herë më e madhe se paraardhësja e saj, “Charles de Gaulle”. Ajo do të jetë 310 metra e gjatë dhe 85 metra e gjerë, ndërsa është projektuar për të mbajtur rreth 30 avionë luftarakë dhe një ekuipazh prej afërsisht 2 000 personash.
Kostoja e ndërtimit vlerësohet të arrijë deri në 10 miliardë euro (rreth 11,7 miliardë dollarë).
Sipas ministres së Mbrojtjes, Catherine Vautrin, e cila foli në platformën X, aeroplanmbajtësja pritet të bëhet funksionale në vitin 2038.
Franca mbetet i vetmi vend, përveç Shteteve të Bashkuara të Amerikës, që zotëron aeroplanmbajtëse me energji bërthamore. Aeroplanmbajtësja aktuale “Charles de Gaulle” është vënë në shërbim që prej vitit 2001. /Skyweb.al
