Qeveria shqiptare ka vendosur të heqë përkohësisht vizat turistike për shtetasit e pesë vendeve, me qëllim nxitjen e turizmit dhe lehtësimin e hyrjes së vizitorëve nga këto shtete në Shqipëri. Vendimi është miratuar këtë të mërkurë në mbledhjen e Këshillit të Ministrave dhe parashikon që qytetarët nga Arabia Saudite, Katari, Omâni, Tajlanda dhe Indonezia të mund të udhëtojnë drejt Shqipërisë pa vizë gjatë periudhës nga 15 prilli deri më 31 dhjetor 2025.
Sipas vendimit, shtetasit e këtyre vendeve do të mund të hyjnë në territorin shqiptar vetëm me pasaportë, për qëllime turistike dhe për një kohë të kufizuar brenda datave të përcaktuara.
Për zbatimin e vendimit janë ngarkuar Ministria për Evropën dhe Punët e Jashtme si dhe Ministria e Brendshme. Ky lehtësim i përkohshëm i regjimit të vizave do të hyjë në fuqi menjëherë pas botimit në Fletoren Zyrtare.
Heqja sezonale e vizave është përdorur edhe më herët nga qeveria shqiptare si një politikë për të tërhequr më shumë turistë nga vendet me potencial të lartë për vizitorë, veçanërisht nga Lindja e Mesme dhe Azia Juglindore./skyweb.al
