Ari është rritur ndjeshëm në tregjet botërore, duke arritur një nivel rekord mbi 3,400 dollarë për ons këtë të hënë. Kjo është hera e parë që çmimi i arit kalon këtë kufi historik. Rritja vjen si pasojë e pasigurive ekonomike dhe politike në botë, shqetësimeve për tregtinë globale, si dhe dobësimit të dollarit amerikan.
Pse njerëzit po blejnë ar?
Në kohë krizash apo pasigurie në tregje, ari shihet si një investim i sigurt, sepse mban vlerën edhe kur aksionet bien. Të dhënat tregojnë se sa herë që indeksi kryesor i bursës amerikane S&P 500 bie, çmimi i arit zakonisht rritet. Kjo po ndodh edhe tani.
Rritje e madhe në blerjet e arit nga bankat qendrore
Bankat qendrore të vendeve të mëdha po blejnë sasi të mëdha ari. Shtetet e Bashkuara kanë rezervat më të mëdha me mbi 8,000 ton. Gjermania është në vendin e dytë. Ndërkohë, Rusia, Kina dhe Turqia kanë dyfishuar rezervat e tyre në 10 vitet e fundit:
Rusia: nga 1,035 ton në 2,333 ton
Kina: nga 1,054 ton në 2,235 ton
Turqia: nga 116 ton në 540 ton
Çfarë pritet të ndodhë më tej me çmimin e arit?
Në 12 muajt e fundit, çmimi i arit është rritur me 41%. Disa analistë parashikojnë që nëse rritja vazhdon, ari mund të arrijë në 3,500 dollarë për ons. Por ka edhe paralajmërime: për shkak të kësaj rritjeje të shpejtë, çmimi mund të bjerë nëse investitorët nisin të shesin për të siguruar disa fitime. /skyweb.al
