Prokuroria e Posaçme kundër Korrupsionit dhe Krimit të Organizuar (SPAK) po kalon në sitë një nga kontratat më të rëndësishme të Autoritetit Rrugor Shqiptar (ARRSH), atë për mbikëqyrjen e punimeve të Tunelit të Llogorasë, duke thelluar hetimet ndaj ish-drejtorit të institucionit, Evis Berberi.
Hetimi ka vënë në qendër të vëmendjes bashkëpunimin e dyshimtë mes kompanisë amerikane “Hill International” dhe shoqërisë shqiptare “Net Group”, e zotëruar nga Valter Begaj, ish-ortaku i Berberit. Dyshimet e SPAK lidhen me faktin se përfshirja e “Net Group” në këtë joint venture mund të jetë rezultat i një ndërhyrjeje të drejtpërdrejtë nga Berberi.
Tenderi për mbikëqyrjen e tunelit, me fond limit prej 1.96 milionë euro, u zhvillua në dhjetor të vitit 2021 dhe u fitua nga bashkimi i këtyre dy kompanive me një ofertë prej 1.94 milionë euro.
Sipas hetuesve të BKH, të cilët vetëm një javë më parë zbarkuan në zyrat e “Hill International” në Tiranë, ka dyshime se kompania amerikane ka pranuar të përfshijë “Net Group” pas një presioni nga ish-kreu i ARRSH-së. Kompania amerikane ka kërkuar kohë për të dorëzuar dokumentacionin, duke sqaruar se ai ndodhej i arkivuar në selinë rajonale në Greqi.
SPAK po heton edhe nëse përmes kompanisë “Net Group” janë devijuar fonde publike drejt një subjekti tjetër – shoqërisë “Daam” – që zyrtarisht është në pronësi të Begajt, por që sipas prokurorëve dyshohet se kontrollohej në mënyrë të tërthortë nga Berberi.
Të dy, Berberi dhe Begaj, u arrestuan në mars të vitit të kaluar dhe ndodhen nën hetim me akuzat për korrupsion dhe pastrim parash. Prokurorët dyshojnë se Berberi ka përdorur pozicionin e tij për t’i dhënë tenderë të paligjshëm Begajt, i cili më pas i kalonte fondet përmes kompanisë “Daam”. /skyweb.al
