Tirana ka paguar ndjeshëm më shumë për sigurimin e jetës, pronës dhe automjeteve gjatë vitit 2024, duke konfirmuar rolin dominues në tregun vendas të sigurimeve.
Të dhënat më të fundit nga Autoriteti i Mbikëqyrjes Financiare bëjnë të ditur se 62.1% e totalit të primeve të shkruara bruto janë përqendruar në kryeqytet, ndërsa Durrësi renditet i dyti me 7.2%, e pasuar nga Korça me 5.2% të totalit.
Qarku Kukësit paraqet vetëm 0.9% të primeve të shkruara bruto, ndërsa Dibra dhe Gjirokastra mbeten në nivele minimale përkatësisht me 1.7% dhe 1.8%, duke reflektuar një aktivitet të kufizuar të sigurimeve në këto zona.
Sipas AMF-së, ky përqendrim i lartë në Tiranë shpjegohet me faktin se pjesa më e madhe e popullsisë, biznesit dhe aktivitetit të kreditimit është e fokusuar në kryeqytet.
Po ashtu, degët dhe zyrat e kompanive operuese në treg janë të pozicionuara kryesisht në Tiranë, duke i dhënë akses më të lehtë qytetarëve për lidhjen e kontratave të sigurimit.
Një tjetër faktor është sasia e lartë e kredive hipotekore, ku bankat kërkojnë detyrimisht polica sigurimi prone dhe jete, kryesisht në Tiranë.
Megjithatë, krahasuar me vitin 2023, shumica e qarqeve kanë shënuar rënie të primeve të shkruara bruto, ndërsa rritje edhe pse të lehtë, kanë regjistruar vetëm Fierit, Dibrës, Lezhës dhe Shkodrës.
Rritet primi për frymë
Në nivel kombëtar, primi për frymë u rrit me 8.8%, duke arritur në 10,364 lekë/frymë më 2024, nga 9,526 lekë/frymë që ishte një vit më parë.
Tirana kryeson bindshëm me 20,011 lekë për frymë,
Ndiqet nga Durrësi me 7,885 lekë/frymë,
Dhe Vlora me 7,819 lekë/frymë.
Në fund të tabelës qëndrojnë Kukësi dhe Berati, si qarku me vlerat më të ulëta të këtij treguesi.
Për sa u takon dëmeve të paguara nga kompanitë e sigurimit, Tirana përthith 67.94% të totalit, ndërsa Durrësi zë vendin e dytë me 10.10%. Qarqet e tjera ndjekin me përqindje dukshëm më të ulëta./skyweb.al
