Llokma 9.1 milionë euro e dekoderave të Televizionit Shqiptar ka hapur një luftë të ashpër, e cila duket se do të luftohet deri në minutën e fundit.
Skyweb.al raportoi dje se RTSH anuloi tenderin në fjalë, ndërkohë që siç shkruan sot Kapitali.al, menjëherë pas vendimit të RTSH-së për të anulluar tenderin, kompania R&T ka bërë sërish ankim në Komisionin e Prokurimit Publik duke kërkuar shfuqizimin e anullimit të tenderit dhe urdhërimin e TVSH-së që të lidhë kontratën.
Kjo është saga e re e përplasjes së ashpër për tenderin, e cila ka nisur që në mars të këti viti, kur u shpall procedura. Tenderi me objekt: “Blerje shërbimi i mirëmbajtjes për Rrjetin e Shpërndarjes DVB-T2 për 48 muaj”, me fond limit 907 milionë lekë u shpall në mars të këtij viti nga drejtoresha në ikje, Aurora Polo.
Vetë shpallja e tenderit me shpejtësi, në kulmin e debateve të për zgjedhjen e drejtorit të ri të RTSH, ishte një veprim që ngrinte pikëpyetje shumë të forta. Megjithatë, pavarësisht këtyre pikëpyetjeve, gara u zhvillua në fillim të prillit dhe në të u paraqitën tre oferta.
Sipas dokumentave zyrtarë, oferta më e ulët u dha nga kompania T.B.S 96 e Artan Xhorit, e cila ofroi ta kryente shërbimin e kërkuar për çmimin 7.6 milionë euro. Kompania R&T ofroi çmimin 8 milionë euro, ndërsa oferta e tretë ishte ajo e bashkimit të kompanive Idea Tel dhe Real Com të cilat ofruan çmimin 9 milionë euro.
Por drejtoresha që e kishte shpallur tenderin e majmë nuk arriti ta përfundonte dot atë. Në datën 25 prill Aurora Polo u largua nga drejtimi i RTSH dhe në krye të këtij institucioni u emërua Eni Vasili. Tre ditë pas emërimit të Vasilit, komisioni i Tenderit në RTSH njoftoi skualifikimin e të treja ofertave të paraqitura në garë, ndërsa pak ditë më vonë anullimin e tij.
Luftë në KPP
Kompania R&T ankimoi në Komisionin e Prokurimit Publik vetëm skualifikimin e saj dhe jo anulimin e tenderit. Gati një muaj më parë, Komisioni i Prokurimit Publik i dha të drejtë kompanisë.
Vendimi i publikuar në faqen zyrtare të KPP, urdhëronte Drejtorinë e Përgjithshme të Radio Televizionit Shqiptar që të anullonte skualifikimin e kompanisë R&T, ccka e shpallte automatikisht fituese të tënderit këtë kompani.
Por një ditë më parë, TVSH njoftoi anullimin e tenderit, me motivacionin se kompania “R&T” nuk dorëzoi brenda afatit vërtetimin që provon se nuk është subjekt i dënuar penal, certifikatën për pagesën e detyrimeve tatimore vendore, si dhe ekstraktin e pronarit përfitues, të cilat konsiderohen dokumente detyruese për kualifikim sipas ligjit për prokurimet publike.
Tashmë kompania R&T e ka ankimuar në KPP dhe anullimin e tenderit.
