Rritja e fortë e numrit të turistëve të huaj po e vendos Shqipërinë përballë një sfide tjetër, garantimit të standardeve higjieno-sanitare dhe të sigurisë ushqimore në strukturat hoteliere.
Në total, nga janari deri në korrik 2026, në Shqipëri janë regjistruar 7.014.168 hyrje të shtetasve të huaj, me një rritje prej 6,5% krahasuar me të njëjtën periudhë të vitit të kaluar.
Ndërkohë, vetëm gjatë qershorit dhe korrikut 2026, sipas të dhënave zyrtare, në Shqipëri u regjistruan 146.099 hyrje të shtetasve polakë. Prej tyre, 64.719 u regjistruan në qershor dhe 81.380 në korrik. Të dhënat për gushtin nuk janë publikuar ende, por si muaji kulmor i sezonit pritet ta rrisë ndjeshëm numrin e turistëve polakë që kanë vizituar Shqipërinë gjatë verës.
Ky fluks rekord kërkon jo vetëm përmirësimin e infrastrukturës pritëse, por edhe rritjen e standardeve të shërbimit, pastërtisë dhe sigurisë ushqimore.
Kjo pasi nuk kanë munguar rastet kur grupe të organizuara turistësh të huaj kanë shfaqur probleme shëndetësore, të dyshuara si pasojë e helmimeve ushqimore në struktura të caktuara hoteliere.
Skyweb.al ka mësuar se disa raste që kanë përfshirë turistë polakë janë përcjellë me shqetësim nga agjencitë turistike në Poloni. Turistët polakë zgjedhin kryesisht zonën Durrës–Golem dhe një pjesë e madhe e tyre mbërrijnë përmes paketave të organizuara.
Redaksia është vënë në dijeni për korrespondenca mes agjencive polake dhe disa njësive hoteliere në Golem, në të cilat janë ngritur shqetësime për kushtet higjieno-sanitare pas rasteve të dyshuara të helmimit të turistëve.
Informacionet e deritanishme nuk mjaftojnë për të përcaktuar nëse bëhet fjalë për raste sporadike apo për një shqetësim më të gjerë. Për këtë arsye, Skyweb.al ka kontaktuar disa prej agjencive turistike polake për të kuptuar panoramën e plotë të situatës.
Më herët, Skyweb.al raportoi për një kontroll të Autoritetit Kombëtar të Ushqimit në Premium Beach Resort në Golem, pasi një grup turistësh të huaj kishte shfaqur simptoma të dyshuara helmimi.
Sipas rezultateve laboratorike të AKU-së, te4 mësuara më pas, në mostrën e djathit të marrë nga restoranti i hotelit ishte konstatuar prania e bakterit Escherichia coli.
Sfida për turizmin shqiptar nuk është më vetëm rritja e numrit të vizitorëve, por garantimi i standardeve që i bëjnë ata të ndihen të sigurt dhe të zgjedhin përsëri Shqipërinë, ndërsa redaksia do të ndjekë më vëmendje zhvillimin e situatave të ngjashme, edhe pse sezoni tashmë është mbyllur. /skyweb.al
