Qeveria spanjolle ka kërkuar zyrtarisht heqjen nga platforma Airbnb të gati 66 mijë pronave me qira afatshkurtër, pasi ato konsiderohen në shkelje të ligjeve për strehimin turistik. Ky vendim vjen në një kohë kur protestat kundër mbi-turizmit janë intensifikuar para sezonit veror, duke përfshirë mijëra qytetarë në demonstratat e fundjavës në Ishujt Kanarie.
Ministri për të Drejtat Sociale dhe Agjendën 2030, Pablo Bustinduy, deklaroi se këto prona “kanë shkelur disa norma për strehimin me përdorim turistik”, përfshirë mungesën e numrit të licencës ose deklarimeve të pasakta mbi statusin ligjor të pronarëve.
Një gjykatë në Madrid ka urdhëruar menjëherë heqjen nga tregu të 4,984 pronave, ndërsa për rreth 60 mijë të tjera, ministria pret vendime të mëtejshme gjyqësore. Prona të paligjshme janë identifikuar në gjashtë rajone: Madrid, Andaluzia, Katalonia, Valencia, Krahina Baske dhe Ishujt Balearik.
Bustinduy e përshkroi vendimin si “një fitore e qartë për ata që mbrojnë të drejtën për strehim”, duke shtuar se “asnjë interes ekonomik nuk duhet të vihet mbi banesat, dhe asnjë kompani, sado e madhe, nuk është mbi ligjin”.
Problematika e banesave është kthyer në shqetësimin më të madh për qytetarët spanjollë, veçanërisht për shkak të rritjes së qirave, që janë dyfishuar në një dekadë, ndërsa pagat nuk e kanë ndjekur këtë ritëm. Apartamentet për turistë po fajësohen gjerësisht si shkaktarë të mungesës së banesave për banorët vendas.
Spanja, vendi i dytë më i vizituar në botë pas Francës, priti 94 milionë turistë të huaj në vitin 2024, një rritje prej 13% krahasuar me një vit më parë. Në këtë kontekst, edhe kryeministri Pedro Sánchez ka pranuar se “ka shumë Airbnb dhe jo shtëpi mjaftueshëm”, duke premtuar ndaljen e zgjerimit të pakontrolluar të tyre.
Në disa qytete, autoritetet lokale kanë nisur masa të forta. Barcelona ka shpallur planin për të eliminuar 10,000 apartamente turistike deri në fund të vitit 2028. Ndërkohë, në zona si Ibiza, Ishujt Kanarie dhe Murcia, Airbnb ka arritur marrëveshje me autoritetet për të respektuar rregullat.
Airbnb ka reaguar duke deklaruar se do të apelojë vendimet, duke theksuar se nuk ka prova që host-ët kanë shkelur rregullat dhe se përgjegjësia për informacionin në listime i takon atyre, jo platformës. Sipas kompanisë, “problemi i strehimit në Spanjë buron nga mungesa e ofertës dhe jo nga platforma si Airbnb”.
Përballë numrit në rritje të vizitorëve dhe presionit mbi tregun e banesave, protestat pritet të shtohen këtë verë. Në Majorka, grupi “Më pak turizëm, më shumë jetë” ka paralajmëruar një tjetër protestë më 15 qershor. /BBC-skyweb.al
