“Travel and Tour World” i ka dedikuar një artikull Shqipërisë ku vlerëson vizionin ambicioz të qeverisë për t’u kthyer në një destinacion kryesor mesdhetar. Artikulli në fjalë thekson zhvillimin e turizmit të qëndrueshëm, promovimin e trashëgimisë kulturore dhe investimet në infrastrukturë moderne.
“Qeveria shqiptare ka hartuar një plan të detajuar për 4 vitet e ardhshme, që synon zhvillimin e turizmit të qëndrueshëm. Pjesë e këtij plani është “Strategjia e Turizmit Shqipëria 2030”, e cila parashikon krijimin e gjashtë rajoneve turistike të ndryshme, për të ofruar një larmi më të madhe përvojash dhe për të ngritur nivelin e turizmit në përputhje me pritshmëritë e vizitorëve ndërkombëtarë”, shkruhet në artikull.
Në këtë kuadër, Shqipëria ka për qëllim ndërtimin e një modeli turizmi që është jo vetëm gjithëpërfshirës, por edhe i qëndrueshëm, duke mos e kufizuar zhvillimin e tij vetëm në sezonin veror. Sipas TTW, synimi është që Shqipëria të bëhet një “perlë e Mesdheut”, ku historia, kultura dhe natyra e bukur bashkëjetojnë me praktikat e turizmit të qëndrueshëm.
Vendi ofron një kombinim unik të peizazheve natyrore, trashëgimisë kulturore dhe mikpritjes tradicionale, një formula që po tërheq gjithnjë e më shumë turistë nga e gjithë bota. Sipas artikullit, një projekt i rëndësishëm është transformimi i Portit të Durrësit dhe ndërtimi i 20 marinave të reja, nga Velipoja në Ksamil, që do të rrisin imazhin e Shqipërisë si një destinacion udhëtimi detar në Mesdhe.
Po ashtu, Shqipëria ofron mundësi të jashtëzakonshme për turizmin malor, ku peizazhet e Alpeve Shqiptare dhe sportet dimërore pritet të bëhen atraksione kryesore për aventurierët, veçanërisht gjatë muajve të dimrit. Trashëgimia kulturore do të mbetet një prioritet tjetër i rëndësishëm i strategjisë. Pjesë e zhvillimit të turizmit është edhe përmirësimi i infrastrukturës digjitale, përmes krijimit të një Regjistri Kombëtar të Turizmit dhe një sistemi elektronik të informacionit për vizitorët, që do të ndihmojë në ofrimin e përvojave më të mira për turistët.
Në këtë mënyrë, Shqipëria po krijon kushte për të tërhequr më shumë vizitorë ndërkombëtarë, duke nxitur rritjen e ekonomisë dhe pozicionimin e vendit si një destinacion turistik kryesor në rajonin e Mesdheut, thekson artikulli. /Skyweb.al
