Katër këshilltarë socialistë nuk votuan shkarkimin e kryebashkiakut Veliajt. Alfred Muharremi dhe Aldo Merkoci ishin të pranishëm dhe nuk votuan, ndërsa, Joleza Koka dhe Gaz Paja nuk morën pjesë në mbledhjen e Këshillit. Ndërsa këshilltari i opozitësFabian Topollaj, votoi kundër vendimit.
Në fjalën e tij, këshilltari socialist Alfred Muharremi vlerësoi punën e Veliajt në krye të Bashkisë së Tiranës, ndërsa Aldo Merkoci u shpreh më ashpër, duke theksuar se me këtë procedurë po cenohet autonomia vendore dhe po tjetërsohet vullneti i qytetarëve.
Lexo edhe: Këshilli Bashkiak voton shkarkimin e Erion Veliajt, socialistët bashkojnë votat me opozitën
Edhe Fabian Topollaj i Bindjes Demokratike e cilësoi nismën si një shkelje të plotë, duke kujtuar se nuk është Këshilli Bashkiak ai që shkarkon një kryebashkiak, por Këshilli i Ministrave, vetëm në rastet e parashikuara nga ligji.
Ai shtoi se argumentet për shkarkimin e Veliajt, me pretendimin se ka tre muaj që mungon në punë, nuk qëndrojnë, pasi mungesa nuk vjen nga dëshira e tij, por nga pamundësia objektive. Ai deklaroi se Veliaj prezumohet i pafajshëm sa kohë që nuk është dënuar nga gjykata. /Skyweb.al
