Kina dhe Rusia kanë realizuar për herë të parë një patrullim të përbashkët me nëndetëse, duke shtuar një kapitull të ri në bashkëpunimin e tyre ushtarak, i cili po shfaqet gjithnjë e më hapur vitet e fundit.
Patrullimi, i zhvilluar në gusht në Detin e Kinës Lindore dhe në Detin e Japonisë, përfshiu nëndetësen ruse Volkhov, një nëndetëse kineze të së njëjtës klasë, si dhe dy anije sipërfaqësore ruse: korvetën Gromkiy dhe një anije shpëtimi për nëndetëse. Sipas mediave ruse, Volkhov përshkoi mbi 2,000 milje deri sa mbërriti në Vladivostok.
Të dyja nëndetëset ishin të klasës Kilo, një dizajn sovjetik i viteve ’70 i njohur për qetësinë akustike. Ekspertët theksojnë se kjo zgjedhje ishte logjike, pasi edhe Kina ka importuar këtë tip nga Rusia, duke i bërë më të thjeshta stërvitjet e përbashkëta. Megjithatë, asnjëra palë nuk përfshiu në patrullim nëndetëset bërthamore, për të shmangur ekspozimin e teknologjisë më të avancuar ndaj një aleati që mund të kthehet në rival në të ardhmen.
Analistët perëndimorë e shohin këtë patrullim si një sinjal paralajmërues ndaj SHBA dhe aleancës AUKUS (SHBA–Britani–Australi), e cila parashikon pajisjen e Australisë me nëndetëse bërthamore. “Kjo është pjesë e përpjekjeve për frikësim strategjik,” u shpreh Lyle Goldstein, drejtor i programit Azi në “Defense Priorities”.
Ky nuk është rasti i parë i bashkëpunimit të tillë. Që nga viti 2019, Pekini dhe Moska kanë realizuar patrullime të përbashkëta ajrore me bombardues, përfshirë një fluturim pranë Alaskës në vitin 2024, si dhe manovra të përbashkëta detare dhe tokësore, siç ishte stërvitja Zapad/Interaction 2021.
Megjithatë, analistët theksojnë se ky bashkëpunim është më tepër praktik sesa një aleancë e thellë. Historia e përplasjes kino-sovjetike në vitet ’60 dhe dyshimet reciproke për territore dhe interesa kombëtare mbeten ende gjallë. “Të dy palët e kuptojnë se interesat e tyre nuk përkojnë gjithmonë. Marrëdhënia ka një dozë maturie – as afërsi e tepruar, as varësi e plotë,” vlerëson Goldstein.
Për momentin, patrullimi me nëndetëse të vjetra shërben më shumë si një mesazh politik sesa si një demonstrim i integrimit të thellë ushtarak. Por analistët paralajmërojnë se nëse në të ardhmen Kina dhe Rusia do të vendosin të operojnë së bashku nëndetëset bërthamore, atëherë situata do të shënonte një zhvillim shumë më shqetësues për ekuilibrat strategjikë globalë. /defensenews
