NASA ka njoftuar se synon të dërgojë katër astronautë në një udhëtim dhjetë ditor rreth Hënës, që mund të ndodhë në fillim të muajit shkurt. Agjencia amerikane e hapësirës kishte deklaruar më parë se do ta realizonte misionin më vonë në fund të prillit, por tani po përpiqet ta përshpejtojë nisjen.
Kanë kaluar mbi 50 vjet që nga hera e fundit që ndonjë vend ka ndërmarrë një mision të tillë me ekuipazh në drejtim të Hënës. Kjo nismë është pjesë e programit Artemis, i cili synon të rikthejë njeriun në Hënë dhe të krijojë një prani të qëndrueshme në sipërfaqen hënore në të ardhmen.
Artemis II, misioni i dytë në këtë program, do të jetë i pari që do të dërgojë astronautë pranë Hënës që nga viti 1972. Katër astronautët që do të marrin pjesë në këtë udhëtim janë: Reid Ëiseman, Victor Glover dhe Christina Koch nga NASA, si dhe Jeremy Hansen nga Agjencia Kanadeze e Hapësirës (CSA). Edhe pse nuk do të zbresin në Hënë, ata do të jenë ekuipazhi i parë që udhëton përtej orbitës së ulët të Tokës në më shumë se gjysmë shekulli.
Lakiesha Haëkins, zëvendës-administratore e përkohshme e NASA-s, e përshkroi këtë moment si historik për eksplorimin hapësinor. “Ne së bashku kemi një vend në rreshtin e parë për të parë historinë që po shkruhet”, tha ajo, ndërsa shtoi se dritarja e mundshme për nisjen hapet më 5 shkurt, por theksoi se siguria është përparësia kryesore.
Drejtuesja e nisjes së Artemis, Charlie Blackëell-Thompson, shpjegoi se raketa e fuqishme Space Launch System (SLS) është tashmë pothuajse e përgatitur për nisje. Tani për tani, pritet të përfundojë përgatitja e kapsulës Orion, që do të strehojë ekuipazhin gjatë misionit, si dhe disa testime përfundimtare në tokë.
Misioni i parë i programit, Artemis I, u zhvillua në nëntor të vitit 2022 dhe ishte pa ekuipazh. Gjatë atij misioni, një anije hapësinore u dërgua për t’u rrotulluar rreth Hënës dhe u rikthye me sukses në Tokë, ndonëse pati disa probleme me mburojën termike gjatë rikthimit në atmosphere, çështje që tani janë adresuar.
Misioni Artemis II do të shërbejë si një test kyç i sistemeve të raketës dhe kapsulës përpara se të ndërmerret zbarkimi në sipërfaqen e Hënës në misionet pasuese. Astronautët do të udhëtojnë në një distancë prej mbi 9,200 kilometrash përtej Hënës, gjë që përfaqëson largësinë më të madhe që ka arritur ndonjëherë ndonjë ekuipazh njerëzor në hapësirë.
“Ekuipazhi do të udhëtojë më larg në hapësirë se çdo njeri më pare”, tha Jeff Radigan, drejtori kryesor i fluturimit për Artemis II.
Misioni do të zgjasë rreth 10 ditë, gjatë të cilave kapsula Orion do të jetë shtëpia e astronautëve. Ajo do të lëshohet fillimisht në orbitën e Tokës me ndihmën e dy raketave ndihmëse të fuqishme, të cilat do të ndahen rreth dy minuta pas nisjes. /Skyweb.al
