Japonia po përballet me një nga sfidat më të mëdha, plakjen e shpejtë të popullsisë dhe mungesën e fuqisë punëtore. Me afro 30% të popullsisë mbi 65 vjeç, vendi aziatik po e ndien më fort mungesën e punonjësve në sektorë që kërkojnë punë fizike, siç janë magazinat dhe logjistika. Për këtë arsye, kompanitë po kthehen gjithnjë e më shumë drejt makinerive dhe robotëve.
Në qendrën e Amazon në Chiba, pranë Tokios, robotët tashmë janë bërë pjesë kryesore e punës: makina që përshtatin automatikisht madhësinë e paketimit, sisteme inteligjente për lëvizjen e rafteve dhe robotë që transportojnë produkte. Këto investime synojnë të përballojnë rritjen e kërkesës për blerje online dhe shpërndarje të shpejtë, në një kohë kur numri i shoferëve të kamionëve dhe punëtorëve të magazinës po bie ndjeshëm. Parashikimet flasin se deri në vitin 2030, Japonia do të ketë një të tretën më pak shoferë kamionësh.
Megjithatë, sfida mbetet e hapur: a do të arrijë Japonia të mbajë ritmin e kërkesës për shpërndarje të shpejtë, ndërkohë që popullsia aktive zvogëlohet dhe makinat marrin gjithnjë e më shumë kontrollin?
Në një artikull, Financial Times shkruan se ka shqetësime për ndikim në punëtorët që humbasin mundësi pune, ose për ulje të vendeve që mund të shfrytëzohen nga njerëz që nuk kanë alternativë. Kjo lidhet me çështjen e politave publike, si të mbështeten punëtorët që preken dhe si të stimulohet rishkollimi profesional. /Skyweb.al
