Ish-zëvendëskryeministrja Belinda Balluku ka reaguar për herë të parë publikisht ndaj hetimit që po zhvillon SPAK në ngarkim të saj, duke hedhur poshtë akuzat dhe pretendimet që qarkullojnë në opinionin publik për pasurinë e saj.
Në një deklaratë për mediat, Balluku tha se ndaj saj po zhvillohet një “gjyq publik”, ndërsa shtoi se hetimin e prokurorisë nuk e ka penguar asnjëherë dhe se është e gatshme të bashkëpunojë për zbardhjen e së vërtetës.
Ajo theksoi se prokurorët dhe gjyqtarët duhet të bëjnë detyrën e tyre pa u ndikuar nga presionet apo debatet publike.
Sipas Ballukut, pretendimet se ajo zotëron qindra prona apo mjete luksi janë të pavërteta dhe pjesë e një narrative që, sipas saj, po përdoret në hapësirën publike.
“Nuk kam as 300 dhe as 30 apartamente. Nuk kam limuzina, nuk kam jahte dhe nuk kam helikopterë. Të gjitha këto janë pjesë e një gjyqi publik që bëhet me shumë lehtësi”, deklaroi ajo.
Ish-ministrja shtoi se është përballur shpesh me akuza dhe debate gjatë karrierës së saj politike dhe se është mësuar me presionin publik.
“Jam rritur me gjyqe publike. Ndoshta kurrizi ma mban sepse jam trajnuar dhe kalitur që e vogël. Unë di të bëj punën time”, u shpreh Balluku.
Në deklaratën e saj ajo nënvizoi gjithashtu se hetimi i nisur prej muajsh duhet të vazhdojë deri në zbardhjen e plotë të së vërtetës, duke theksuar se nuk e ka penguar asnjëherë procesin as si ministre dhe as si qytetare e Republikës./skyweb.com
