Presidenti amerikan Donald Trump dhe homologu i tij kinez, Xi Jinping, janë takuar për herë të parë pas gjashtë vitesh, një takim që ka rritur shpresat për uljen e tensioneve mes dy ekonomive më të mëdha në botë.
Trump e përshkroi takimin, i cili u zhvillua në Korenë e Jugut, si “të mrekullueshëm”, ndërsa Pekini deklaroi se të dyja palët kishin arritur një “konsensus për zgjidhjen e çështjeve kryesore tregtare”.
Marrëdhëniet SHBA–Kinë kanë qenë të tensionuara që kur Trump filloi vendosjen e tarifave mbi produktet kineze, të cilave Pekini iu përgjigj me masa reciproke. Edhe pse në maj u arrit një “armëpushim” tregtar, tensionet mbetën të larta.
Takimi i së enjtes nuk solli një marrëveshje formale, por deklaratat e të dyja palëve sugjerojnë se janë më afër një marrëveshjeje, detajet e së cilës janë negociuar prej kohësh në prapaskenë. Zakonisht, marrëveshjet tregtare kërkojnë vite për t’u përfunduar, por administrata aktuale amerikane i ka detyruar vendet partnere të veprojnë me shpejtësi.
Një arritje e rëndësishme për Trump është se Kina ka rënë dakord të pezullojë kufizimet e eksportit të metaleve të rralla, të cilat janë jetike për prodhimin e gjithçkaje, nga telefonat inteligjentë deri te avionët luftarakë.
Presidenti amerikan, në një deklaratë për gazetarët në avionin “Air Force One”, u shpreh i entuziazmuar se Kina do të nisë menjëherë blerjen e “sasisë së madhe të sojës dhe produkteve të tjera bujqësore amerikane”. Tarifat hakmarrëse të Pekinit kishin ndaluar praktikisht importet e sojës nga SHBA, duke dëmtuar fermerët amerikanë.
Megjithatë, nuk pati ndonjë përparim të dukshëm në çështjen e TikTok-ut. SHBA kërkon që operacionet amerikane të aplikacionit të ndahen nga kompania mëmë kineze, ByteDance, për arsye sigurie kombëtare. Pekini deklaroi se do të vazhdojë të punojë për zgjidhjen e kësaj çështjeje.
Nga ana tjetër, SHBA ka njoftuar se do të heqë pjesërisht disa tarifa të vendosura mbi Kinën për shkak të përbërësve që përdoren në prodhimin e fentanilit, drogë që ka shkaktuar krizë të thellë në SHBA. Megjithatë, pjesa tjetër e tarifave do të mbetet në fuqi, që do të thotë se mallrat kineze që hyjnë në tregun amerikan do të vazhdojnë të taksohen me më shumë se 40%.
Trump gjithashtu deklaroi se Kina do të ketë mundësinë të zhvillojë bisedime me Jensen Huang, shefin e kompanisë amerikane të teknologjisë Nvidia. Kompania është në qendër të përplasjes mes dy vendeve për çipat e inteligjencës artificiale: Kina kërkon akses në çipa të nivelit të lartë, ndërsa SHBA po e kufizon atë për arsye sigurie kombëtare.
Pekini gjithashtu e ka ftuar Trumpin për një vizitë në Kinë në prill, një tjetër shenjë e përmirësimit të marrëdhënieve. /Skyweb.al
