Në pranverën e vitit 2024, Li Hongxing, një emër i njohur në fushën e marketingut për industrinë e automjeteve në Kinë, ndërmori një nga rreziqet më të mëdha të karrierës së tij. Duke besuar se kishte përballë një yll të ri në ngritje në tregun e makinave elektrike, ai vendosi të mbështesë financiarisht një fushatë reklamuese për startup-in Ji Yue, një kompani që premtonte shumë: efikasitet, rritje të shpejtë të shitjeve dhe mbështetje nga investitorë me përvojë.
Për të përballuar shpenzimet e reklamave, Li mori hua miliona juanë, duke e ndërtuar gjithë planin mbi premtimin se kompania do ta shlyente më vonë. Por realiteti ishte krejt ndryshe. Vetëm gjashtë muaj më vonë, Ji Yue falimentoi pa paralajmërim, duke e lënë Li-n të përballet i vetëm me një borxh prej 40 milionë juanësh (rreth 5.6 milionë dollarë). “Ishte një ndjenjë dëshpërimi të thellë,” kujton ai.
Por rasti i Ji Yue nuk është i vetmi në panoramën e industrisë së makinave elektrike në Kinë. Në vitet e fundit, qindra kompani kanë mbyllur dyert, duke mos mundur të përballojnë një garë të ashpër çmimesh dhe një treg që është mbushur përtej kapacitetit. Megjithëse Kina është bërë lider global në prodhimin dhe shitjen e makinave elektrike, kjo arritje ka ardhur me një kosto të madhe për sipërmarrësit dhe furnitorët e vegjël.
Për vite me radhë, qeveria kineze ka ofruar subvencione dhe mbështetje të drejtpërdrejtë për industrinë e automjeteve elektrike, në përpjekje për të nxitur inovacionin, për të reduktuar ndotjen dhe për të forcuar ekonominë. Kjo politikë pati sukses fillestar, duke nxitur lindjen e gjigantëve si BYD, por gjithashtu hapi derën për dhjetëra startup-e që nuk kishin strukturën për të mbijetuar në një treg kaq agresiv.
Sot, me një treg të stërngopur dhe me konsumatorë gjithnjë e më të ndjeshëm ndaj çmimeve, industria ndodhet në një luftë të vazhdueshme çmimesh. Fitimet janë shkrirë, prodhuesit e mëdhenj po u kërkojnë furnitorëve të shesin pjesë nën kosto, ndërsa pagesat po vonohen me muaj të tërë. Kjo situatë po përplas gjithnjë e më shumë sipërmarrës dhe partnerë financiarë si Li Hongxing me realitetin brutal të një industrie në krizë.
Ndërkohë që makinat elektrike janë simbol i të ardhmes dhe zhvillimit teknologjik, për shumë sipërmarrës në Kinë, ato po kthehen në një makth financiar. Dhe rasti i Ji Yue është një kujtesë e qartë se pas çdo suksesi të shpejtë, mund të fshihet një rrezik edhe më i madh. /Skyweb.al
