Industria globale e teknologjisë po përjeton një tjetër valë shkarkimesh edhe gjatë vitit 2025, duke vijuar prirjen e vitit të kaluar kur u raportuan mbi 150 mijë vende pune të humbura. Vetëm në muajt e parë të këtij viti janë mbyllur më shumë se 22 mijë pozicione, duke prekur kompani të mëdha që deri pak kohë më parë po zgjeronin me shpejtësi stafin.
Microsoft ka qenë një nga emrat më të mëdhenj që ka ndërmarrë reduktime të ndjeshme, duke larguar rreth 9 mijë punonjës, që përbëjnë afro 4 për qind të fuqisë punëtore të saj globale. Lëvizja është pjesë e një plani më të gjerë optimizimi të shpenzimeve në një kohë kur kompania po orienton burimet drejt inteligjencës artificiale dhe shërbimeve cloud.
Një tjetër kolos i industrisë, Intel, ka nisur një program të gjerë shkurtime vendesh pune. Vetëm në SHBA parashikohet të eliminohen mbi 5,500 vende, ndërsa deri në fund të vitit 2025 numri total i vendeve të prekura mund të arrijë deri në 25 mijë. Situata tregon presionet me të cilat po përballet kompania përballë rënies së kërkesës dhe konkurrencës së shtuar në tregun e çipeve.
Edhe Salesforce ka prekur ndjeshëm stafin e saj, duke shkarkuar 4 mijë punonjës, kryesisht nga shërbimi i klientit. Nga 9 mijë punonjës që kishte ky departament, tashmë kanë mbetur rreth 5 mijë, teksa kompania po ristrukturon strategjitë dhe po përqendrohet gjithnjë e më shumë tek inteligjenca artificiale.
Oracle, nga ana tjetër, ka kryer shkurtime në disa rajone të botës. Vetëm në zonën e San Franciskos janë larguar mbi 250 punonjës, ndërsa pushimet kanë prekur edhe Indi, Kanada dhe disa vende europiane.
Këto zhvillime përkojnë me ndryshime të rëndësishme në politikën e emigracionit në SHBA. Presidenti Donald Trump ka nënshkruar një urdhër ekzekutiv që rrit ndjeshëm tarifat për vizat H-1B, duke e bërë më të vështirë për profesionistët e huaj të gjejnë mundësi punësimi në kompanitë amerikane të teknologjisë. Kjo masë pritet të ketë ndikim të drejtpërdrejtë në tregun global të punës dhe në mënyrën se si kompanitë do të rekrutojnë talente në të ardhmen.
Në këtë klimë të pasigurt, ekspertët e industrisë theksojnë se shkarkimet nuk janë vetëm pasojë e ngadalësimit ekonomik, por edhe e transformimit të madh që po sjell inteligjenca artificiale, duke ndryshuar strukturat dhe nevojat e kompanive për fuqi punëtore./Skyweb.al
