Nga sot, çdo emigrant shqiptar mund t’i dërgojë para familjes së tij në Shqipëri përmes SEPA, sistemit evropian të pagesave në euro. I njëjti mekanizëm do t’u mundësojë edhe qytetarëve dhe bizneseve brenda vendit të kryejnë transaksione drejt vendeve të tjera evropiane, me kosto shumë më të ulët dhe shpejtësi më të madhe.
Ky zhvillim shënon një hap historik në integrimin financiar të Shqipërisë me Bashkimin Evropian, pas hyrjes së vendit në Zonën e Vetme të Pagesave në Euro (SEPA) në fund të vitit 2024.
SEPA përfshin 41 vende evropiane, ndër të cilat edhe shtete jashtë BE-së, dhe i lejon qytetarët e këtyre vendeve të kryejnë pagesa elektronike në euro njësoj si brenda vendit – të shpejta, të sigurta dhe me kosto minimale.
Sipas Bankës së Shqipërisë, përfshirja në SEPA pritet të ulë koston e transfertave ndërkufitare në euro të paktën 5 herë. Vetëm gjatë vitit të parë, kursimi për ekonominë shqiptare parashikohet të jetë rreth 20 milionë euro, me tendencë në rritje në vitet pasuese.
Për transaksionet që nisen nga Shqipëria, komisionet maksimale do të jenë:
deri në 20 mijë euro – 2 euro;
deri në 100 mijë euro – 0,01% e vlerës;
mbi 100 mijë euro – maksimumi 25 euro.
Kjo do të thotë se një student shqiptar mund t’i paguajë universitetit të tij në Itali apo Gjermani vetëm me disa euro komision, ndërsa bizneset mund të kryejnë pagesa ndërkombëtare me kosto simbolike.
Për transaksionet që mbërrijnë në Shqipëri – pra për paratë që dërgojnë emigrantët nga vendet SEPA – komisionet nuk do të kalojnë 3 euro. Kështu, nëse një shqiptar në Itali, Gjermani apo Francë dërgon para familjes, banka në Shqipëri do të mbajë maksimumi 3 euro komision.
Me remitancat që vetëm në gjysmën e parë të vitit 2025 kapën 531 milionë euro, kjo ulje tarifash përkthehet në miliona euro kursim për familjet shqiptare.
Transfertat mund të kryhen si në sportel, ashtu edhe përmes aplikacioneve bankare. Për një pagesë SEPA nevojitet vetëm:
emri i përfituesit,
IBAN-i në euro,
shuma për transferim.
Pagesat kryhen në kohë reale për dërgesat e shpejta, ndërsa për transfertat standarde nevojiten 1–2 ditë pune.
Sipas Bankës së Shqipërisë, infrastruktura e pagesave po kalon në një fazë të re modernizimi. Pas AIPS, tashmë me SEPA, hapi i radhës do të jetë sistemi i pagesave të menjëhershme (instant payments), një version i përshtatur i sistemit TIPS të Bankës së Italisë, që do të lejojë transferimin e menjëhershëm të parave 24/7.
Aplikimi zyrtar i Shqipërisë për anëtarësim në SEPA u bë në qershor 2024, ndërsa vendimi për përfshirjen u mor në nëntor të po atij viti. Në prill 2025, bankat shqiptare u pranuan zyrtarisht në skemë.
Falë këtij integrimi, Shqipëria konsiderohet tashmë de facto pjesë e Bashkimit Evropian në fushën e pagesave, duke ofruar qytetarëve dhe bizneseve një standard të barabartë me atë të vendeve të BE-së. /skyweb.al
