Parlamenti gjerman ka miratuar një paketë të re investimesh në mbrojtje me vlerë mbi 7 miliardë euro, që përfshin blerjen e avionëve të rinj luftarakë, automjete të blinduara dhe pajisje moderne për forcat tokësore e detare.
Vendimi u mor nga Komisioni i Buxhetit në Bundestag, i cili dha dritën jeshile për 14 projekte të mëdha të prokurimeve ushtarake. Pjesën më të madhe të fondeve, rreth 3.75 miliardë euro, do ta marrë kontrata për 20 avionë të rinj Eurofighter Tranche 5, që pritet të dorëzohen mes viteve 2031–2034.
Këta avionë do të pajisen me radarë të rinj EScan dhe aftësi të përmirësuara për luftën elektronike, duke zëvendësuar flotën e vjetër të Tornado-ve. Së bashku me to, do të blihen pjesë këmbimi, pajisje mirëmbajtjeje dhe simulatorë trajnimi me vlerë 412 milionë euro.
Një projekt tjetër i rëndësishëm, me vlerë 1.13 miliardë euro, synon modernizimin e flotës ekzistuese të Eurofighterëve me sisteme të avancuara për ndërhyrje elektronike dhe neutralizim të mbrojtjeve ajrore armike.
Ndryshe nga shumë blerje të tjera, ky investim do të financohet nga buxheti i rregullt i Ministrisë së Mbrojtjes, dhe jo nga fondi special prej 100 miliardë eurosh i krijuar pas pushtimit rus të Ukrainës.
Në listën e investimeve të miratuara përfshihen gjithashtu automjete të reja të blinduara Boxer për trajnime dhe misione mjekësore, mjete luftarake të lehta ajrotransportueshme, si dhe zhvillimi i një ure ponton të re për kalimin e lumenjve. /skyweb.al
