Rreth 20 hidraulikë në Ëisconsin, SHBA tani shkojnë në shtëpitë e klientëve jo vetëm me çantat e veglave, por edhe me tableta të pajisura me versionin më të fundit të ChatGPT.
Sipas presidentit të kompanisë, Dan Callies, ChatGPT i ndihmon ata të krijojnë automatikisht fatura, propozime për punë dhe madje të mendojnë zgjidhje për probleme të ndërlikuara teknike. Mjafton që ata të shkruajnë disa shënime ose të ngarkojnë foto të pajisjes së prishur, dhe AI gjeneron një listë me rekomandime. “Ka qenë një investim që ia ka vlejtur,” thotë Callies, duke shtuar se edhe punonjësit më të vjetër kanë filluar të mësojnë si t’i bëjnë pyetjet e duhura AI-së.
Kjo teknologji po përdoret jo vetëm në terren, por edhe në punët administrative të zyrës, duke kursyer kohë dhe kosto.
Një tjetër kompani, Gulfshore Air Conditioning & Heating në Florida, përdor AI për të menaxhuar të gjithë procesin nga kërkesa e klientit deri në mbërritjen e teknikëve, pa ndërhyrje njerëzore. Teknikët e saj përdorin AI për të diagnostikuar problemet dhe për të gjetur dokumentacionin teknik përmes disa klikimeve, një punë që më parë kërkonte leximin e qindra faqeve manuale.
Sipas një ankete të realizuar nga Housecall Pro me më shumë se 400 profesionistë të zanateve në Amerikën e Veriut:
70% kanë provuar mjete AI;
40% i përdorin rregullisht;
hidraulikët janë ata që raportojnë rritjen më të madhe të biznesit falë AI;
Pastruesit janë adoptuesit më të mëdhenj;
Elektriçistët kanë kënaqësinë më të lartë nga përdorimi i AI.
Edhe shkollat profesionale po përshtaten. Disa institucione po integrojnë AI në kurrikulën e tyre në bashkëpunim me bizneset, për t’i përgatitur studentët për një treg pune që po ndryshon me shpejtësi. /Skyweb.al
