Fondi Monetar Ndërkombëtar ka rishikuar në ulje pritshmëritë për rritjen ekonomike të Shqipërisë për vitin 2025, duke parashikuar një zgjerim prej 3.4%, nga 3.8% që ishte vlerësuar në raportin e pranverës.
Raporti më i fundit i Pasqyrës Ekonomike Globale, i publikuar në tetor, tregon se ndonëse ekonomia shqiptare do të vijojë rritjen, ritmi i saj do të jetë më i ngadaltë se parashikimet e mëparshme.
FMN parashikon gjithashtu një rritje të lehtë për vitin 2026, ku ekonomia e vendit pritet të zgjerohet me 3.6%, nga 3.5% në raportin e mëparshëm, duke sinjalizuar një stabilizim të moderuar në afatin e mesëm.
Në aspektin e çmimeve, inflacioni mesatar vjetor parashikohet të arrijë 2.3% në 2025, nga 2.2% në 2024, dhe të ngjitet në 2.8% në 2026, duke reflektuar një presion të moderuar inflacionist në periudhën e ardhshme.
Në krahasim rajonal, Kosova pritet të ketë rritjen më të lartë ekonomike, me 3.9% në 2025 dhe 4% në 2026, ndërsa Maqedonia e Veriut do të ketë të njëjtin nivel rritjeje si Shqipëria, me 3.4%. Mali i Zi parashikohet të rritet me 3.2%, ndërsa Bosnja e Hercegovina me 2.4% në 2025 dhe 2.7% në 2026. Në të njëjtën linjë, Serbia pritet të ruajë një rritje modeste prej 2.4% vitin e ardhshëm.
Parashikimet e reja të FMN-së tregojnë se ekonomia shqiptare po hyn në një fazë më të ngadaltë rritjeje, pas ritmeve të forta të pas-pandemisë, ndërsa sfidat e inflacionit, produktivitetit dhe investimeve mbeten kyçe për ruajtjen e qëndrueshmërisë ekonomike. /skyweb.al
