Tiranë, 4 Tetor 2025 – Aeroporti Ndërkombëtar i Tiranës (TIA) njoftoi sot nisjen e fluturimit të parë direkt që lidh Tiranën me Larnakën, Qipro, duke shënuar një moment të rëndësishëm në zgjerimin e destinacioneve direkte për pasagjerët. Fluturimi u krye nga kompania Wizz Air, një ndër partnerët kryesorë të TIA-s.
Fluturimi i parë u përurua në TIA me një ceremoni të veçantë ku morën pjesë përfaqësues të Wizz Air, ekipi menaxhues i TIA-s dhe përfaqësues të medias. Sipas traditës, ekuipazhi i fluturimit të parë u prit me buqeta me lule, duke simbolizuar vlerësimin dhe bashkëpunimin e fortë me partnerët ajrorë.
Nga sot, fluturimet midis Tiranës dhe Larnakës do të zhvillohen dy herë në javë – çdo të martë dhe të shtunë – duke i ofruar pasagjerëve më shumë mundësi për udhëtime turistike, biznesi dhe shkëmbime kulturore.
Manjola Kaso, Drejtore e Zhvillimit të Biznesit të Aviacionit & Marketingut në Aeroportin Ndërkombëtar të Tiranës, u shpreh:
“Nisja e fluturimeve direkte drejt Larnakës përfaqëson një hap të rëndësishëm në misionin tonë për të lidhur më tej Shqipërinë me destinacionet kryesore europiane. Qipro ofron potencial kulturor dhe biznesi, dhe jemi të bindur se kjo linjë do të mirëpritet ngrohtësisht nga pasagjerët tanë. Së bashku me partnerët tanë, do të vazhdojmë të zgjerojmë mundësitë e udhëtimit dhe të forcojmë rolin e TIA-s si porta kryesore që lidh Shqipërinë me botën.”
Wizz Air mbetet një nga partnerët më të rëndësishëm të TIA-s, duke ofruar një gamë të gjerë destinacionesh dhe duke kontribuar ndjeshëm në rritjen e shpejtë të numrit të pasagjerëve. Shtimi i Larnakës e pasuron më tej gamën e lidhjeve për udhëtarët, duke reflektuar përpjekjet e përbashkëta të TIA-s dhe linjave ajrore për të përmirësuar aksesin dhe për të forcuar pozicionin e Shqipërisë në tregun europian të aviacionit.
Rreth Aeroportit Ndërkombëtar të Tiranës (TIA)
Aeroporti Ndërkombëtar i Tiranës është aeroporti më i madh në Shqipëri dhe më i madhi në Ballkanin Perëndimor për sa i përket numrit të pasagjerëve dhe destinacioneve. Me investime të vazhdueshme në infrastrukturë, TIA është e përkushtuar për t’u ofruar pasagjerëve një përvojë udhëtimi të sigurt, efikase dhe mikpritëse.
