Programi i Boeing për certifikimin e avionit të ri B777X po përballet me vonesa të tjera, megjithëse drejtuesi i kompanisë, Kelly Ortberg, konfirmoi se procesi mbetet i planifikuar për vitin 2026 dhe nuk pritet të shtyhet deri në 2027.
Duke folur në një konferencë të organizuar nga Morgan Stanley, Ortberg pranoi se ka ende një “mal me punë” përpara se avioni të marrë certifikimin e Administratës Federale të Aviacionit (FAA). Ai paralajmëroi se edhe një “vonesë e vogël” në afate do të kishte ndikim financiar për kompaninë. “Jemi qartësisht prapa planit tonë për të përfunduar certifikimin,” tha Ortberg. B777-9, varianti i parë i familjes B777X, ishte planifikuar fillimisht të certifikohej që në vitin 2020.
Sa i përket prodhimit të B737 MAX, Boeing synon të rrisë ritmin nga 38 avionë në muaj në 42 deri në fund të vitit. Por kompania duhet të përmirësojë një nga gjashtë treguesit kryesorë të performancës përpara se të marrë lejen e FAA për të rritur kapacitetin. Ortberg tha se është i sigurt se shumë shpejt do të ulen në tryezë me autoritetet amerikane për këtë çështje.
Kompania po përparon gjithashtu në certifikimin e ndryshimeve në sistemin e shkrirjes së akullit për modelin B737-7, i cili pritet të marrë miratimin në tremujorin e parë të vitit 2026. “Procesi është në rrugë dhe besojmë se do ta mbyllim vitin tjetër,” theksoi Ortberg, duke shtuar se vonesat kanë qenë të frustruese, por dizajni aktual është i fortë dhe i qëndrueshëm.
Sipas The Seattle Times, vonesat në programet B777X, B737-7 dhe B737-10, si dhe kufizimet e prodhimit të linjave ekzistuese, po pengojnë Boeing të nisë punën për një avion krejtësisht të ri. Ortberg u shpreh se kompania duhet të mbyllë sfidat e certifikimit ekzistues për të gjeneruar të ardhurat e nevojshme që do të financojnë zhvillimin e një gjenerate të re avionësh. “Nuk mund ta imagjinoj që të ndërtojmë një aeroplan të ri pa e rafinuar këtë proces,” tha ai. /skyweb.al
