Shqipëria ka hapur edhe katër grup-kapituj të rinj në procesin e integrimit europian, por sfida e radhës do të jetë mbyllja e tyre. Në konferencën e përbashkët me Kryeministrin Edi Rama dhe Ministren e Çështjeve Europiane të Danimarkës, Marie Bjerre, Komisionerja Europiane për Zgjerimin, Marta Kos, kujtoi se “është më e vështirë të mbyllësh kapitujt sesa t’i hapësh”.
Kos theksoi se Bashkimi Europian do të mbështesë Shqipërinë, por kërkoi rezultate konkrete nga reformat. “Shqipëria duhet të japë gjithçka është e nevojshme. Vizioni i ekipit tuaj është që negociatat të përmbyllen deri në fund të vitit 2027 dhe ne do t’ju mbështesim me gjithë fuqinë tonë”, tha ajo.
Nga ana e tij, Kryeministri Rama u shfaq optimist, duke vlerësuar mbështetjen e vendeve anëtare, veçanërisht Danimarkës. Ai u shpreh se shqiptarët “kanë në krah Vikingët”, duke përdorur metaforën për të ilustruar sigurinë që i jep mbështetja daneze në procesin e integrimit.
Rama e cilësoi hapjen e kapitujve një rekord për Shqipërinë, me pesë grup-kapituj të hapur në vetëm 11 muaj. Ai u zotua se qeveria do të vijojë me ritëm reformat për të arritur objektivin e mbylljes së procesit deri në fund të vitit 2027.
Komisionerja Kos ndërkohë e vlerësoi Shqipërinë si një histori suksesi në rajon, duke nënvizuar se lidershipi politik dhe orientimi i qartë pro-europian janë faktorë vendimtarë për progresin. Ajo theksoi se procesi do të mbetet i bazuar në meritë dhe se çdo hap do të vlerësohet sipas rezultateve konkrete. /skyweb.al
