Dy senatorë amerikanë, Josh Hawley dhe Richard Blumenthal, i kanë kërkuar Komisionit Federal të Tregtisë (FTC) dhe Komisionit për Shkëmbime dhe Vlera (SEC) të nisin një hetim ndaj Meta Platforms, pas publikimeve që tregojnë se në Facebook dhe Instagram qarkullojnë reklama mashtruese në përmasa shumë të mëdha.
Sipas dokumenteve të brendshme të kompanisë, Meta parashikonte që rreth 10% e të ardhurave të saj për vitin 2024, ose rreth 16 miliardë dollarë, do të vinin nga reklama të paligjshme apo mashtruese. Një tjetër dokument tregon se kompania fiton rreth 3.5 miliardë dollarë çdo gjashtë muaj nga reklamat me rrezik të lartë, si skemat mashtruese, lojërat e fatit të jashtëligjshme dhe produkte të ndaluara.
Senatorët akuzojnë Meta-n për moszbatim të rregullave të sigurisë dhe reduktim të stafit të dedikuar për mbrojtjen e përdoruesve, ndërkohë që kompania fokusohet në projekte të reja të inteligjencës artificiale. Sipas tyre, rrjedhojë e kësaj është rritja e reklamave mashtruese në platformat e saj. Disa vlerësime sugjerojnë se rreth një e treta e mashtrimeve të kryera në SHBA lidhen me platformat e Meta-s, me dëme që kapin mbi 50 miliardë dollarë për konsumatorët.
Një ndër shqetësimet kryesore janë reklamat që shtiren si nisma zyrtare qeveritare apo si deklarata të figurave politike, përfshirë edhe reklama që pretendojnë se presidenti Donald Trump po ofron 1,000 dollarë për personat që marrin ndihmë ushqimore.
Senatorët kërkojnë masa ligjore që Meta të rikthejë fitimet e përfituara nga këto reklama, të paguajë gjoba dhe të ndalojë lejimin e tyre në platformat e saj.
Meta ka mohuar akuzat, duke deklaruar se vlerësimet e përmendura janë të pasakta. Sipas kompanisë, raportimet e mashtrimeve nga përdoruesit janë ulur me 58% gjatë 18 muajve të fundit. /Skyweb.al
