Ambasada e SHBA në Tiranë ka bërë të ditur se tetë anëtarë të Gardës së Republikës, të angazhuar në mbrojtjen e zyrtarëve të qeverisë shqiptare dhe prokurorëve të SPAK, kanë marrë pjesë në një trajnim të avancuar taktik të zhvilluar nga Shërbimi Sekret amerikan në Budapest.

Në mesin e pjesëmarrësve në këtë trajnim ishin edhe truprojat e kreut të SPAK, Altin Dumani. Trajnimi u zhvillua në Akademinë Ndërkombëtare të Zbatimit të Ligjit të Shteteve të Bashkuara, një strukturë e specializuar që përgatit oficerë sigurie nga vende të ndryshme të botës.

Në njoftimin e saj, Ambasada Amerikane thekson se SHBA mbështet ata që kontribuojnë në luftën kundër krimit të organizuar në Shqipëri. Ajo nënvizon se, përveç trajnimeve, vijon të ofrojë edhe pajisje taktike për forcimin e kapaciteteve të sigurisë, si dhe zhvillon rregullisht programe përgatitore me personelin që mbron zyrtarët e sistemit të drejtësisë në vend.

Sipas ambasadës, ky bashkëpunim synon të forcojë më tej aftësitë profesionale të trupave shqiptare të sigurisë dhe garantimin e mbrojtjes së zyrtarëve të drejtësisë që luajnë rol kyç në luftën kundër korrupsionit dhe krimit të organizuar. /Skyweb.al