Kompania më e madhe në botë për ushqime të ambalazhuara, Nestlé, do të shkurtojë 16,000 vende pune në përpjekje për të ulur kostot dhe për të rikthyer besimin e investitorëve. Lajmin e konfirmoi të enjten CEO i ri i kompanisë, Philipp Navratil.
Shkurtimet përfaqësojnë 5.8% të fuqisë punëtore globale të Nestlé, që aktualisht numëron rreth 277,000 punonjës. Sipas Navratil, objektivi i kursimeve të kostove është rritur nga 2.5 miliardë në 3 miliardë franga zvicerane (rreth 3.77 miliardë dollarë) deri në fund të vitit 2027, shkruan Reuters.
Megjithëse shumica e shitjeve në SHBA realizohen nga prodhimi lokal, tarifat e importit në SHBA përbëjnë një sfidë për Nestlé. Ndërkohë, prodhuesit e ushqimeve në tërësi po përballen me pasiguri të konsumatorëve dhe zakone të reja ushqyerjeje, pasi njerëzit po orientohen gjithnjë e më shumë drejt një stili jetese të shëndetshëm. /Skyweb.al
