Shqipëria rezulton të ketë pabarazinë më të ulët në rajon, sipas të dhënave të fundit të INSTAT, që matin shpërndarjen e të ardhurave përmes koeficientit Gini.
Ky tregues, që varion nga 0 në 100 për qind, mat shkallën e pabarazisë ekonomike në një vend, sa më i ulët të jetë, aq më të barabarta janë të ardhurat mes qytetarëve.
Sipas raportit të publikuar për vitin 2024, koeficienti Gini në Shqipëri është 29.8 për qind, duke shënuar rënie me 0.8 pikë përqindje krahasuar me vitin 2023. Kjo e vendos vendin tonë në pozicionin më të favorshëm në Ballkan sa i takon shpërndarjes së të ardhurave.
Në krahasim me fqinjët, Serbia regjistron një nivel pabarazie prej 32.8 për qind, Mali i Zi 31.5 për qind, Maqedonia e Veriut rreth 31 për qind dhe Bosnjë-Hercegovina 30.5 për qind.
Ndërkohë, Bullgaria, vend anëtar i Bashkimit Evropian, ka një nga nivelet më të larta të pabarazisë në rajon, me 38.4 për qind, sipas të dhënave të Eurostat.
Ekspertët e ekonomisë theksojnë se ky rezultat tregon një shpërndarje më të balancuar të të ardhurave në Shqipëri, megjithëse niveli absolut i tyre mbetet më i ulët në raport me vendet e rajonit.
Faktorët që kanë ndikuar pozitivisht përfshijnë rritjen e punësimit, forcimin e politikave sociale dhe efektin e remitancave, të cilat kanë amortizuar ndikimin e krizave të fundit në ekonomi.
Megjithatë, perceptimi publik është krejt ndryshe nga statistikat zyrtare. Sipas Bankës Botërore, në raportin e saj ekonomik për Ballkanin të publikuar në pranverë, qytetarët në Shqipëri dhe rajon ndjejnë se pabarazia është shumë më e lartë nga sa tregohet në të dhëna.
Rreth dy të tretat e popullsisë në Ballkan mendojnë se hendeku mes të pasurve dhe të varfërve është zgjeruar gjatë katër viteve të fundit, ndërsa në Shqipëri dhe Maqedoninë e Veriut mbi 80 për qind e të anketuarve besojnë se situata po përkeqësohet.
Banka Botërore paralajmëron se ky ndarje midis realitetit ekonomik dhe perceptimit publik është shqetësuese, sepse cenon besimin në institucionet dhe efektivitetin e politikave që synojnë uljen e pabarazisë.
Në standardet ndërkombëtare, një koeficient Gini nën 30 për qind konsiderohet tregues i pabarazisë së moderuar, ndërsa vlerat mbi 35 për qind sinjalizojnë ndarje të theksuar midis shtresave të pasura dhe atyre me të ardhura të ulëta. /skyweb.al
