Kryeministri Edi Rama mori pjesë në aktivitetin për prezantimin e projektit të Identitetit Digjital, duke e cilësuar këtë si një hap të rëndësishëm në rrugëtimin e Shqipërisë drejt modernizimit teknologjik të jetës sociale dhe ekonomike.
Gjatë fjalës së tij, Kreu i Qeverisë njoftoi se në fillim të vitit të ardhshëm çdo shtetas shqiptar do të pajiset me një mjet identifikimi digjital, duke e cilësuar këtë si një proces që vendos Shqipërinë përpara shumë vendeve të tjera evropiane.
“Bashkimi Europian po përgatitet për identitetin digjital dhe objektivi i shpallur i BE-së është që deri në vitin 2027 qytetarët e saj të mund të pajisen me këtë identitet. Ne do të jemi një hap më para – jo për të treguar përparësi, por për të kujtuar se teknologjia u jep avantazh atyre që e përqafojnë me vizion,” tha Rama.
Sipas tij, teknologjia digjitale është një “bekim i kohës sonë”, që i lejon vendet të kapërcejnë pengesa historike dhe të modernizojnë administratën, ekonominë dhe shërbimet publike në funksion të qytetarëve. /skyweb.al
