Gjykata e Apelit të Posaçëm ka urdhëruar Prokurorinë e Posaçme (SPAK) të regjistrojë dhe të nisë hetimet ndaj kryetares së Bashkisë Lushnje, Eriselda Sefa, pas një kallëzimi penal të paraqitur nga qytetari A.H.
Sipas burimeve, kallëzimi i dorëzuar në SPAK përfshin dy akuza penale ndaj Sefës: falsifikim dokumentesh dhe veprime që pengojnë zbulimin e së vërtetës. Fillimisht, SPAK kishte vendosur të mos fillonte hetimet, vendim që u mbështet edhe nga Gjykata e Shkallës së Parë të GJKKO-së, e cila e pushoi çështjen.
Por qytetari kallëzues nuk u ndal këtu. Ai paraqiti ankim në Apel, duke sjellë fakte dhe dokumente të reja mbi veprimet e kryebashkiakes. Pas shqyrtimit, Apeli i Posaçëm ka vendosur që SPAK të regjistrojë procedimin penal dhe të zhvillojë hetime të plota.
Në kallëzim, A.H. akuzon Sefën për shkelje ligjore në procedurën e dhënies me qira të një pasurie publike në rrugën “Kongresi i Lushnjës”, duke pretenduar se në dokumentacion janë kryer falsifikime si në dëgjesat publike ashtu edhe në projektin e miratimit të kontratës nga Këshilli Bashkiak dhe vetë kryetarja.
Një tjetër pikë e kallëzimit lidhet me mosdorëzimin e dokumenteve të plota në SPAK, të cilat, sipas kallëzuesit, ishin kyçe për zbardhjen e shkeljeve të pretenduara. “Kryetarja e Bashkisë Lushnje, duke mos ia dërguar SPAK-ut praktikën e plotë, e ka bërë me qëllim fshehjen e veprimtarisë kriminale të vitit 2022”, thuhet në kallëzim.
Vendimi i Apelit të Posaçëm i hap rrugë hetimeve të reja ndaj kryebashkiakes Eriselda Sefa, ndërsa pritet që SPAK të kërkojë dhe analizojë të gjithë dokumentacionin për dhënien me qira të pasurisë publike në fjalë. /skyweb.al
