Në Danimarkë pritet të miratohet një ligj që përcakton moshën minimale për përdorimin e mediave sociale. Qeveria daneze ka arritur marrëveshje me partitë e tjera parlamentare për të vendosur kufirin e moshës 15 vjeç për përdorimin e disa platformave të mediave sociale. Megjithatë, prindërit do të kenë mundësinë t’u lejojnë fëmijëve të tyre që të hapin llogari në këto rrjete që në moshën 13 vjeç.
Sipas ministres së Digjitalizimit, ligji ka për qëllim të mbrojë më mirë fëmijët dhe të rinjtë nga rreziqet që paraqet bota digjitale. Ajo tha se kjo nismë do t’u japë fëmijëve më shumë kohë për pushim, lojë dhe zhvillim personal përpara se të përballen me sfidat e mediave sociale.
Ende nuk është përcaktuar se kur dhe në çfarë mënyre do të zbatohet ligji, dhe gjithashtu nuk është bërë e ditur se cilat platforma do të përfshihen. Marrëveshja parashikon që kufizimet të zbatohen për platformat më të mëdha, ato ku përdoruesit mund të krijojnë profile publike dhe që konsiderohen me rrezik për fëmijët dhe të rinjtë.
Danimarka synon të bëhet një nga vendet e para të Bashkimit Evropian që vendos kufizime të tilla dhe të nxisë diskutimin për këtë çështje në nivel evropian. Si shembull për këtë politikë përmendet Australia, ku tashmë është vendosur që të rinjtë mund të përdorin platforma si TikTok, Snapchat, YouTube, Facebook dhe Instagram vetëm pas moshës 16 vjeç./Skyweb.al
