Autoriteti i Konkurrencës ka hapur një hetim paraprak mbi tregun me pakicë të shërbimeve celulare në Shqipëri, që përfshin periudhën 1 janar 2022 – 25 korrik 2025.
Sipas Konkurrencës, ky hetim ka për qëllim mbrojtjen e interesave të konsumatorëve, duke garantuar një treg më të hapur dhe të ndershëm, ku përdoruesit të kenë shërbime me cilësi dhe me çmime të drejta.
Institucioni fton të gjithë përdoruesit e shërbimeve celulare të ndajnë ankesat, shqetësimet dhe problematikat e tyre lidhur me këtë treg, në mënyrë që ato të merren në konsideratë gjatë procesit të hetimit.
Sipas të dhënave të fundit të Autoritetit të Komunikimeve Elektronike dhe Postare (AKEP), që i referohen tremujorit të parë të këtij viti, numri i pajtimtarëve të shërbimeve celulare sipas kartave SIM ishte rreth 3 milionë e 254 mijë, që përbën një rënie me 4.2% në krahasim me tremujorin e mëparshëm, dhe një rënie me 12.3% në krahasim me tremujorin e parë 2024.
Numri i përdoruesve aktivë të telefonisë celulare gjatë tremujorit të parë 2025 arriti në rreth 2.4 milionë, që përbën një rënie me rreth 2.2% me tremujorin e fundit 2024 dhe rënie me rreth 1.8% krahasuar me të njëjtën periudhë të një viti më parë.
/skyweb.al
