Korporata e Investimeve Shqiptare ka vendosur të shtyjë deri më 19 mars afatin për dorëzimin e aplikimeve për projektin LIFT Tower, duke ndryshuar afatin e mëparshëm të 5 marsit, i cili ishte përcaktuar në thirrjen e shpallur më 30 janar.
Vendimi vjen në një moment kur projekti ka një histori të gjatë procedurash të dështuara për shkak të mungesës së interesit nga investitorët, çka ka detyruar institucionin të rishikojë kushtet e bashkëpunimit në favor të sektorit privat.
Ndryshimi kryesor lidhet me përqindjen e sipërfaqes që duhet t’i kalojë shtetit. Në shpalljet e mëparshme, investitorit i kërkohej të dorëzonte të paktën 45 për qind të sipërfaqes së zhvilluar, ndërsa në thirrjen aktuale kjo prag është ulur në 40 për qind.
Çfarë është projekti i Lift Tower
Projekti LIFT Tower është pjesë e paketës së parë të nismave për zhvillimin e pronës shtetërore në partneritet me sipërmarrjen private, së bashku me projektin VOID Tower. Skema parashikon që shteti të ofrojë truallin, ndërsa zhvilluesi të financojë ndërtimin, në këmbim të hapësirave për institucionet publike.
Sipas dokumenteve të Korporatës, projekti bazohet në bashkëpunimin mes disa institucioneve, përfshirë Agjencinë Shtetërore të Kadastrës, Agjencinë Shtetërore për Shpronësimin dhe Agjencinë e Trajtimit të Pronave. Qëllimi është zhvillimi i pronës në rrugën “Muhamet Gjollesha”, pranë Fakultetit të Inxhinierisë së Ndërtimit, dhe përmirësimi i infrastrukturës së zyrave publike.
Nëpërmjet këtij zhvillimi, institucionet pritet të përfitojnë rreth 34 mijë metra katrorë sipërfaqe ndërtimore moderne pa kosto financiare direkte, ndërsa do të zhvendosen në godinat e reja pas përfundimit të projektit.
Projekti parashikon ndërtimin e një kulle shumëfunksionale me 40 kate mbi tokë dhe 7 kate nëntokë, që do të përfshijë zyra, ambiente tregtare, parkime, hoteleri, rezidenca studentore dhe banesa. Trualli ku do të zhvillohet kulla ka një sipërfaqe rreth 2,357 metra katrorë dhe konsiderohet me vlerë të lartë ekonomike.
Kjo është hera e pestë që Korporata hap thirrjen për përzgjedhjen e një investitori privat, pas katër procedurave të mëparshme të mbyllura pa ofertë të vlefshme. Në thirrjen e parë në nëntor 2024 u kualifikuan dy kompani, por asnjëra nuk paraqiti ofertë, ndërsa në procedurat pasuese aplikimet rezultuan të pavlefshme ose nuk pati interes.
Dështimet e njëpasnjëshme kanë ngritur dyshime mbi fizibilitetin e projektit, duke qenë se kërkesat për ndarjen e sipërfaqes me shtetin dhe kostot e larta të ndërtimit reduktojnë ndjeshëm potencialin e fitimit për investitorët. Në të njëjtën kohë, tregu i kullave në Tiranë po përballet me sinjale të para të ngadalësimit, çka shton pasigurinë për projekte të kësaj shkalle.
Në këtë kontekst, shtyrja e afatit shihet si një përpjekje për të testuar edhe një herë interesin e tregut, ndërsa mbetet e paqartë nëse rishikimi i kushteve do të mjaftojë për të tërhequr një ofertë konkrete për realizimin e projektit. /skyweb.al
