Një artikull i publikuar nga Forbes ngre një dilemë të njohur në shumë kompani: a duhet paralajmëruar një punonjës i ri për një ekip me kulturë toksike apo është më mirë ta zbulojë vetë me kalimin e kohës?
Sipas analizës, pyetja e vërtetë nuk është nëse duhet ta bësh këtë, por si ta bësh në mënyrë inteligjente dhe profesionale, pa ndikuar negativisht në qëndrimin e punonjësit të ri apo në imazhin tënd.
Ekspertët e menaxhimit që citohet nga Forbes theksojnë se një paralajmërim i drejtpërdrejtë dhe emocional mund ta dëmtojë punonjësin e ri, duke krijuar te ai paragjykime dhe pasiguri përpara se të ketë një përvojë reale në vendin e punës.
Nga ana tjetër, heshtja totale mund ta lërë të pambrojtur përballë një klime të tensionuar, rivaliteteve apo sjelljeve toksike që ndikojnë në performancë.
Artikulli sugjeron një qasje të balancuar dhe të kujdesshme, ku punonjësit me përvojë ofrojnë këshilla praktike në vend të ankesave.
Në vend që të “shpërndajnë negativitet”, ata duhet të ndihmojnë të riun të kuptojë mënyrën më efektive të komunikimit me drejtuesit apo kolegët problematikë, duke e orientuar drejt suksesit, jo frikës.
“Forbes” thekson se përgjegjësia për krijimin e një kulture pune të shëndetshme bie kryesisht mbi menaxherët dhe drejtuesit e ekipeve, të cilët duhet të ndërhyjnë për të shmangur krijimin e mjediseve toksike që dëmtojnë motivimin dhe produktivitetin.
Në përfundim, artikulli nënvizon se transparenca është thelbësore, por duhet shoqëruar me takt, profesionalizëm dhe mbështetje reale, në mënyrë që një punonjës i ri të mos dekurajohet që në fillim, por të ketë mundësinë të kuptojë situatën dhe të përshtatet pa u ndikuar nga paragjykimet. /skyweb.al
