Këshilli i Ministrave ka miratuar një paketë të re ndryshimesh që prek drejtpërdrejt pagat dhe trajtimin financiar të punonjësve të sistemit shëndetësor, duke rishikuar pagën bazë, shtesat për vjetërsi, kompensimet për shërbimet kritike dhe pagesat për punën në urgjencë dhe larg vendbanimit.
Një nga ndryshimet kryesore lidhet me mënyrën e llogaritjes së shtesës për vjetërsi në punë. Sipas skemës së re, shtesa nuk do të llogaritet më mbi pagën minimale, por mbi pagën e pozicionit, duke u rritur progresivisht sipas viteve të shërbimit.
Për dhjetë vitet e para të punës, shtesa do të jetë 0.6 për qind për çdo vit, për njëzet vite shërbimi 0.8 për qind, ndërsa për tridhjetë vite pune shtesa arrin në 1 për qind për çdo vit. Qëllimi i kësaj formule është vlerësimi i përvojës dhe qëndrueshmërisë së personelit në sistem.
Vendimi parashikon gjithashtu shtesa mujore të posaçme për shërbimet më të ngarkuara dhe kritike të spitaleve. Mjekët që punojnë në urgjencë, reanimacion, hemodinamikë, njësitë e aksidenteve cerebrale dhe neonatologji do të përfitojnë një shtesë mujore prej 18 mijë lekësh.
Ndërkohë, infermierët, teknikët e imazherisë dhe laboratorit në këto shërbime, si edhe mjekët dhe infermierët e urgjencës mjekësore paraspitalore, do të përfitojnë nga një shtesë mujore prej 12 mijë lekësh.
Rritje dhe diferencim parashikohen edhe për pagesat e shërbimit të urgjencës dhe të rojës.
Për shërbimet 24 orëshe, pagesa ditore do të jetë 2 mijë e 700 lekë në ditët e zakonshme dhe 3 mijë e 200 lekë në ditët e diel dhe festat zyrtare.
Vendimi përcakton gjithashtu tarifa të veçanta për shërbimet me orar 16 orësh dhe 12 orësh, në varësi të ngarkesës dhe ditëve të punës.
Një tjetër element i rëndësishëm është rikonfirmimi i kompensimit mujor për mjekët dhe personelin teknik që punojnë larg vendbanimit të tyre.
Kjo masë synon të mbulojë vështirësitë e shërbimit në zona të largëta dhe të ndihmojë në mbajtjen e personelit shëndetësor në territore me mungesë burimesh njerëzore.
Në kuadër të politikës së përgjithshme të pagave në sektorin publik, skema e re përfshin edhe indeksimin me 2.5 për qind të pagave të pozicioneve në sistemin shëndetësor për vitin 2026, si pjesë e rregullimit vjetor të pagave.
Vendimi prek gjithashtu aspektet organizative të institucioneve shëndetësore, duke u dhënë titullarëve mundësinë të kontraktojnë deri në tre këshilltarë të jashtëm, shqiptarë ose të huaj, me pagesë mujore deri në 112 mijë e 750 lekë, pas miratimit nga Ministria e Shëndetësisë.
Efektet financiare të këtij vendimi do të zbatohen nga data 1 janar 2026 dhe përfshijnë të gjitha institucionet shëndetësore publike, përfshirë strukturat në varësi të Ministrisë së Shëndetësisë, shërbimet shëndetësore të Forcave të Armatosura, sistemin e burgjeve dhe Policinë e Shtetit. /skyweb.al
