Gjatë muajit gusht janë regjistruar gjithsej 159 aksidente rrugore në vend, me 229 persona të përfshirë, përfshirë si të vrarë, ashtu edhe të plagosur. Megjithëse shifrat vijojnë të mbeten shqetësuese, të dhënat e publikuara nga INSTAT tregojnë për një tendencë positive, në periudhën janar–gusht të këtij viti, numri i aksidenteve ka pësuar një rënie me 14,7% krahasuar me të njëjtën periudhë të vitit të kaluar.
Përkundër këtij përmirësimi, sjellja e drejtuesve të mjeteve vazhdon të jetë faktori dominues në shkaktimin e aksidenteve, duke përbërë 91,2% të rasteve. Brenda kësaj kategorie, më të përfshirët janë drejtuesit e grupmoshës 45–59 vjeç, të cilët kanë shkaktuar më shumë se një të katërtën e ngjarjeve rrugore (25,8%).
Analiza e shpërndarjes ditore të aksidenteve në gusht tregon se dita më problematike ka qenë e hëna, me 18,2% të totalit, ndërsa dita më e qetë ka rezultuar të jetë e marta, me vetëm 11,3% të rasteve. Sa i përket orareve, periudha më e rrezikshme është ajo ndërmjet orës 19:00 dhe 24:00, kur janë regjistruar 23,3% e aksidenteve.
Pavarësisht uljes së përgjithshme të rasteve, të dhënat nënvizojnë nevojën për masa të shtuara parandaluese, sidomos në mbrëmje dhe në fillim të javës, kur rreziku për aksidente është më i lartë. Sjellja e drejtuesve mbetet një pikë kyçe që kërkon ndërgjegjësim dhe ndërhyrje më të forta nga autoritetet përkatëse. /Skyweb.al
