Të dhënat më të fundit të INSTAT tregojnë se paga mesatare mujore bruto për një të punësuar me pagë ka pësuar një rritje të ndjeshme në tremujorin e dytë të vitit 2025 krahasuar me të njëjtën periudhë të vitit 2022.
Në total, paga mesatare arriti në 83,906 lekë, ose 136.2% e nivelit të saj tre vite më parë.
Rritja ka qenë veçanërisht e fortë në sektorin shtetëror, ku paga mesatare u ngjit në 99,525 lekë, duke shënuar një rritje prej 141% në krahasim me vitin 2022. Ky zhvillim e vendos sektorin publik dukshëm përpara sektorit privat në aspektin e shpërblimit financiar.
Ndërkohë, paga mesatare në sektorin privat u rrit në 77,137 lekë, duke shënuar një përmirësim më të ngadaltë prej 133.9%.
Diferenca mes dy sektorëve po zgjerohet, duke reflektuar një trend ku punonjësit e administratës përfitojnë më shumë nga politikat e rritjes së pagave, ndërsa tregu privat nuk ka arritur të ndjekë të njëjtin ritëm.
Këto shifra ngrenë pikëpyetje mbi balancën e tregut të punës dhe konkurueshmërinë e sektorit privat, i cili rrezikon të mbetet pas në garën për tërheqjen dhe mbajtjen e punonjësve të kualifikuar. /skyweb.al
