Megjithëse interesi për makinat elektrike është rritur dhe në rrugët shqiptare po shfaqen gjithnjë e më shumë automjete të teknologjisë së re, Shqipëria vazhdon të ketë një flotë autoveturash tepër të vjetër. Më shumë se 9 në 10 autovetura që qarkullojnë në vend kanë një moshë mbi 10 vjet, ndërsa automjetet elektrike zënë ende një pjesë minimale të tregut.
Të dhënat e raportit “Transporti në Shifra 2025”, të publikuar nga INSTAT, tregojnë se 91.1% e autoveturave në Shqipëri janë më të vjetra se një dekadë, një tregues që nxjerr në pah moshën e lartë të mjeteve që përdoren nga qytetarët.
Sipas raportit, 45.7% e autoveturave kanë një moshë nga 11 deri në 20 vjet, ndërsa 45.4% janë mbi 20 vjeç. Kjo do të thotë se pothuajse gjysma e makinave në vend janë prodhuar përpara më shumë se dy dekadash.
Në anën tjetër, vetëm 8.9% e autoveturave kanë një moshë deri në 10 vjet, ndërsa automjetet relativisht të reja, me moshë deri në dy vjet, përbëjnë vetëm 1.7% të flotës.
Situata nuk ndryshon shumë as kur analizohet lloji i karburantit që përdorin automjetet.
Pavarësisht interesit në rritje për makinat elektrike dhe hibride, nafta vazhdon të dominojë rrugët shqiptare. Plot 72.1% e autoveturave përdorin naftë, ndërsa 16% benzinë.
Automjetet që përdorin benzinë dhe gaz përbëjnë 9.4% të flotës, ndërsa makinat hibride zënë vetëm 1.2%.
Makinat tërësisht elektrike përfaqësojnë vetëm 1.3% të autoveturave në Shqipëri, duke treguar se kalimi drejt teknologjive të reja mbetet ende në fazat e para.
Megjithatë, numri i automjeteve në vend vijon të rritet me ritme të shpejta.
Në fund të vitit 2025, Shqipëria numëronte 847,191 autovetura, nga 775,217 në vitin 2024, me një rritje prej 9.3% brenda një viti.
Kjo do të thotë se në regjistrin e mjeteve janë shtuar rreth 72 mijë autovetura në vetëm 12 muaj.
Edhe shkalla e motorizimit është rritur. Nga 326 autovetura për 1,000 banorë në vitin 2024, treguesi ka arritur në rreth 361 në vitin 2025.
Sa u përket markave, Mercedes-Benz vazhdon të kryesojë flotën e mjeteve rrugore me 18%, i ndjekur nga Volkswagen me 16.7%.
Mercedes-Benz dominon veçanërisht te autoveturat e prodhuara përpara vitit 2000, ku përfaqëson 35.9% të tyre, ndërsa Volkswagen kryeson te automjetet e prodhuara pas këtij viti.
Të dhënat tregojnë se, ndonëse tregu automobilistik shqiptar po zgjerohet dhe teknologjitë elektrike po tërheqin gjithnjë e më shumë vëmendje, struktura e flotës ekzistuese mbetet e dominuar nga autoveturat e vjetra dhe motorët me naftë.
Për momentin, makinat elektrike janë ende një pjesë shumë e vogël e një tregu ku më shumë se 91% e autoveturave kanë kaluar moshën 10-vjeçare. /skyweb.al
