Një nga ngjarjet më të jashtëzakonshme në historinë e aviacionit daton më 26 janar 1972, kur një stjuardesë 23-vjeçare, Vesna Vulović, mbijetoi një rënie nga mbi 10 mijë metra lartësi, pas shpërthimit në ajër të avionit ku ndodhej.
Vulović ishte pjesë e ekuipazhit të një fluturimi të kompanisë ajrore jugosllave JAT, kur një shpërthim në ajër shkatërroi avionin në një lartësi prej rreth rreth 10 000 metrash.
Të gjithë pasagjerët dhe pjesëtarët e tjerë të ekuipazhit humbën jetën, ndërsa ajo mbeti e vetmja e mbijetuar, në një rast që më vonë do të regjistrohej si rekord botëror nga Guinness World Records.
Sipas analizave të mëvonshme, mbijetesa e saj ishte rezultat i një kombinimi të rrallë faktorësh. Ajo mbeti e bllokuar nga një karrocë ushqimi brenda pjesës së bishtit të avionit, e cila nuk u shpërbë plotësisht dhe funksionoi si një lloj kapsule mbrojtëse gjatë rënies.
Segmenti i avionit u përplas në një zonë malore të mbuluar me dëborë dhe pyje, duke zbutur ndjeshëm forcën e impaktit.
Përveç faktorëve fizikë, edhe gjendja e saj biologjike luajti rol vendimtar.
Mjekët zbuluan se Vulović kishte tension të ulët të gjakut, çka bëri që ajo të humbte ndjenjat menjëherë pas dekompresimit të kabinës. Kjo, sipas ekspertëve, mund të ketë parandaluar ndalimin e menjëhershëm të zemrës nga stresi ekstrem i rënies.
Megjithëse pësoi dëmtime të rënda, përfshirë fraktura në kafkë dhe këmbë, si dhe paralizë të përkohshme, ajo arriti të rikuperohej dhe të ecte sërish brenda 10 muajve.
Rënia nga rreth 10,160 metra mbetet edhe sot rekordi botëror për mbijetesën nga lartësia më e madhe pa parashutë, një ngjarje që vijon të konsiderohet ndër më të pamundurat dhe më të rrallat në historinë moderne të aviacionit. /skyweb.al
