Buxheti i vitit 2026 shënon nivelin më të lartë historik të financimeve publike. Sipas draftit, të ardhurat buxhetore programohen në rreth 8.5 miliardë euro, të bazuara te përmirësimi i administrimit fiskal dhe ulja e informalitetit, ndërsa shpenzimet arrijnë 8.9 miliardë euro ose 31.9 për qind të PBB-së, rreth 550 milionë euro më shumë se plani i rishikuar i 2025. Deficiti parashikohet në 2.3 për qind të PBB-së, i njëjtë me vitin paraardhës.
Një peshë qendrore në buxhet i jepet politikave sociale. Vetëm për rritjen e pensioneve, sipas skemës së re, parashikohet një fond prej 100 milionë euro, ndërsa 135 milionë euro shkojnë për rimbursimin e medikamenteve. Qeveria ka parashikuar gjithashtu financimin e plotë të efektit të pagës minimale 50 mijë lekë. Për herë të parë parashikohet indeksimi i pagave të administratës publike me 2.5 për qind, duke hyrë në fuqi më 1 janar 2026.
Investimet publike për vitin e ardhshëm arrijnë në rreth 1.9 miliardë euro, ndërsa fondi i rindërtimit mbetet në 50 milionë euro. Për kontratat koncesionare do të shpenzohen 120 milionë euro, një ulje e lehtë krahasuar me vitin 2025. Sektorët prioritarë mbeten shëndetësia, mbrojtja sociale, infrastruktura, energjia, arsimi dhe ushtria.
Sa i takon shpërndarjes sipas institucioneve, Ministria e Shëndetësisë dhe Mirëqenies Sociale merr fonde rekord prej 853 milionë euro, që përfshijnë rritjen e pagave dhe investimet në shërbimet shëndetësore. Ministria e Infrastrukturës dhe Energjisë disponon 800 milionë euro, të fokusuara në projektet rrugore dhe hekurudhore. Ministria e Arsimit merr 680 milionë euro, duke mbuluar pagat e mësuesve dhe investimet në shkolla. Ndërsa Ministria e Mbrojtjes ka një buxhet prej 610 milionë euro, për të mbajtur angazhimin e Shqipërisë për një financim mbi 2 për qind të PBB-së në kuadër të NATO-s.
Ky projektbuxhet synon rritje të qëndrueshme, zgjerim të politikave sociale dhe forcim të kapaciteteve të investimeve publike, duke u fokusuar te shtresat në nevojë, sistemet bazë të shërbimeve dhe detyrimet strategjike të vendit. /skyweb.al
