Zyrtarët e shëndetësisë paralajmërojnë për një sezon gripi më të fortë në Europë, pasi një lloj i ri virusi po qarkullon më herët se zakonisht. Në një raport nga Qendra Evropiane për Parandalimin dhe Kontrollin e Sëmundjeve (ECDC), thuhet se rastet e gripit po evidentohen 3–4 javë më herët se dy vitet e fundit.
Ky variant i ri i gripit është një nënkladë e gripit A, e njohur si H3N2 K, që po favorizon përhapjen e virusit. Megjithatë, nuk është ende e qartë se sa i rëndë do të jetë sezoni i ardhshëm. ECDC paralajmëron se situata mund të jetë më problematike nëse mbulimi me vaksina mbetet i ulët.
Edoardo Colzani, ekspert për viruset në ECDC, deklaroi se koha është kritike: “Po shohim që zbulimet e gripit po rriten shumë më herët se zakonisht këtë vit”, dhe u bëri thirrje njerëzve të vaksinohen sa më shpejt.
Agjencia rekomandon vaksinim “pa vonesë” për grupet e rrezikuara: të moshuarit, gratë shtatzëna, njerëzit me sëmundje kronike ose imunitet të dobësuar, stafin shëndetësor dhe banorët e institucioneve të kujdesit. Po ashtu, ECDC sugjeron që klinikat dhe institucionet mjekësore të marrin masa shtesë, si përdorimi i maskave në spitale dhe dhomat e urgjencës, për të parandaluar përhapjen e sëmundjes. /Skyweb.al
