Pas përplasjeve, akuzave dhe epiteteve të shumta që kishin shkëmbyer publikisht, Presidenti amerikan Donald Trump dhe kryetari i zgjedhur i Bashkisë së Nju Jorkut, Zohran Mamdani, u ulën përballë njëri-tjetrit në Zyrën Ovale dhe vendosën të nisin një kapitull të ri bashkëpunimi. Takimi, i përshkruar nga të dy si i ngrohtë dhe konstruktiv, u përqendrua tek e ardhmja e qytetit më të madh të SHBA-së.
Trump u shpreh i gatshëm ta mbështesë Mamdanin në projektet e tij për Nju Jorkun.
“Shpresoj të keni një kryetar bashkie të shkëlqyer. Sa më mirë të punojë ai, aq më i lumtur jam unë. Nuk ka rëndësi partia. Ne do ta ndihmojmë të bëjë realitet synimin që të gjithë dëshirojmë: një Nju Jork të fortë dhe të sigurt”, deklaroi presidenti.
Ndërsa Mamdani tha se takimi u zhvillua në frymë të mirë dhe u fokusua tek sfidat reale të qytetit.
“Biseduam për qiratë, ushqimin, shërbimet – gjithçka që lidhet me jetesën e përballueshme për banorët. Pres me padurim të punojmë së bashku për t’i përmirësuar këto”, u shpreh ai.
Gazetarët rikthyen në vëmendje sharjet e mëparshme mes dy politikanëve, si “komunist”, “despot” apo “fashist”, por Mamdani tha se pavarësisht dallimeve të mëdha, të dy u fokusuan te prioritetet e përbashkëta.
“Ne jemi shumë të qartë për pikëpamjet tona. Por vlerësoj që presidenti zgjodhi të flasim jo për mosmarrëveshjet, por për shërbimin ndaj njujorkezëve”, tha ai.
Trump e mori me humor situatën:
“Më kanë quajtur shumë më keq se ‘despot’, kështu që nuk është ndonjë fyerje e madhe. Ndoshta do ta ndryshojë mendimin kur të fillojmë të punojmë së bashku”, u shpreh ai duke qeshur.
Presidenti madje pranoi se disa ide të Mamdanit janë të ngjashme me të tijat, duke lënë të hapur mundësinë e një bashkëpunimi më të gjerë në të ardhmen. /Skyweb.al
